Namibië gasheer vir mynboukenners

’n Organisasie wat met 276 hoogs geleerde lede van 49 lande wêreldwyd spog, asook 114 universiteite en instansie vir hoër onderwys, hou vanaf verlede week sy 32ste jaarvergadering by die Windhoek Buitekluboord.Die Namibië Universiteit van Wetenskap en Tegnologie (Nust) se prof. Harmony Musiyarira is tans die president van die Vereniging van Mynbouprofessore (SOMP). Hy was betrokke by die organisering van die geleentheid wat verlede Woensdag afgeskop het.Sestig kenners van onder meer universiteite van Beijing, Kentucky, Nieu-Suid-Wallis, Colombia, Hanoi en Clausthal in Duitsland, vergader in Namibië met nog 20 wat die geleentheid tot vandag virtueel bywoon om die nuutste inligting oor volhoubare mynbou, navorsing en hoër onderwys te deel. Die mynboukommissaris, mnr. Erasmus Shivolo, het by die amptelike opening ’n toespraak namens die minister van myne en energie, mnr. Tom Alweendo, voorgelees. Die regering verwelkom samewerking as die uitgangspunt in die soektog na gehalte en uitnemendheid, sê hy. “Dit is net as jy jouself oopstel tot die res van die wêreld dat jy meer van die leidende gesag kan leer,” het Alweendo gesê. “Mynbou sal baat by hierdie vloei van kennis en innovasie,” het hy gesêGedurende Maandag se program het prof. Neville Plint, direkteur van die volhoubare minerale fakulteit aan die Universiteit van Queensland in Australië, onder meer gepraat oor ’n nuwe benadering tot mynbou. Hy sê volhoubare resultate van mynbou moet met beplanning begin gebaseer op kwessies van betrokke gemeenskappe en omgewings. “Besluit eers hoe ’n goeie uitkoms lyk, waar jy betrokke gemeenskappe en die omgewing in ag neem. Mynbou het ’n belangrike rol om te speel en om by ‘net zero’ uit te kom, sal meer metale as ooit nodig wees. “Die groot voetspoor van myne, en hul groot uitskotdamme, is nie meer aanvaarbaar nie. Ingenieure bring hierdie kwessies bymekaar,” het Plint gesê. “Daar moet van die begin af vir die toemaak van ’n myn beplan word,” dring hy aan. As ’n praktisyn in hoër onderwys glo Plint die professore poog om, “gegradueerdes wat reg vir werk is, en gereed vir die toekoms is, te ontwikkel”. – augetto@republikein.com.na

Namibië gasheer vir mynboukenners

Kommentaar

Republikein 2026-05-04

Meld asseblief aan om kommentaar te lewer

Namibië gasheer vir mynboukenners

Kommentaar

Republikein 2026-05-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.