Minder papier, meer onderrig

’n Elektriese ingenieur van die Namibië Universiteit van Wetenskap en Tegnologie (Nust) het ’n revolusionêre skoolbestuurstelsel ontwikkel wat spesifiek vir Namibië ontwerp is. Laurentius Haindaka se stelsel verander die manier waarop privaat skole administrasie, onderrig en ouerbetrokkenheid hanteer, terwyl dit terselfdertyd die uitdaging van oormatige papierwerk in die onderrigstelsel takel. Haindaka is die besturende direkteur van die Rhodes Private School in die Oshikotostreek. Sy inligting- en datastelsel vir skole (SIDS), wat as ’n bestuursoplossing beskryf word, word reeds by vyf privaat skole landswyd gebruik.In ’n onderhoud met Republikein het Haindaka gesê die saadjie vir SIDS is tydens gesprekke in personeelkamers en vergaderings vir skoolhoofde geplant.Terwyl hy as waarnemende skoolhoof gedien het, het hy eerstehands ervaar hoeveel tyd onderwysers en administratiewe personeel aan take soos die aanteken van punte, die druk van verslae, die byhou van rekords en die opvolg van die invordering van skoolgeld by ouers bestee. Hy het besef dis ’n nasionale probleem en was vasbeslote om ’n oplossing te soek. “Ek wou ’n stelsel ontwikkel wat werklik die uitdagings verstaan waarmee Namibiese skole te kampe het, uitdagings wat ek self ervaar het,” het hy verduidelik.Haindaka het in Augustus verlede jaar begin om SIDS te ontwikkel. Volgens hom is dit nie ’n voltooide produk nie, maar ’n dinamiese stelsel wat ontwikkel namate meer skole dit aanneem en op grond van voorstelle wat van skoolhoofde, onderwysers en ouers ontvang word.Hy werk saam met ’n sagteware-ontwikkelaar om sy visie te verwesenlik. Rhodes Private School het as toetsgrond vir die stelsel gedien en ná suksesvolle proeflopies word dit in totaal by vyf skole gebruik. Die kerndoelwit is om meer tyd vir onderrig aan onderwysers terug te gee deur leerlingrekords, bywoningsregisters, akademiese verslae en kommunikasie te digitaliseer. Dit verminder ook aansienlik die finansiële las verbonde aan papier, drukwerk en ink. SIDS is spesifiek ontwerp om by die Namibiese onderwysstelsel, leerplan en operasionele realiteite van plaaslike skole aan te pas. Vir leerlinge bied dit ’n digitale platform om te studeer, huiswerk te doen en toegang tot materiaal vir lesse te verkry. Elke lesplan bevat omvattende aantekeninge, terwyl die stelsel oor ’n kunsmatige intelligensie (AI)-tutor beskik wat leerlinge help om konsepte teen hul eie tempo te begryp, eerder as om bloot antwoorde te verskaf wat uit die kop geleer moet word.Vir ouers bied SIDS ’n direkte skakel na klaskameraktiwiteite. Terugvoer oor gedrag word intyds deur onderwysers via e-pos en die platform gekommunikeer. Ouers kan ook bekommernisse opper, skoolgeld betaal deur middel van ’n geïntegreerde Bank Windhoek-betalingspoort en toetsuitslae en digitale rapporte besigtig. SIDS outomatiseer ook die stempel en ondertekening van rapporte. Volgens Haindaka het ouers net toegang tot inligting wat met hul eie kind verband hou en onderwysers se toegang is beperk tot hul spesifieke rolle. Die kantoor van die eerste minister het aangedui dat dit bereid is om SIDS-data hangende die goedkeuring van die ministerie van onderwys, vernuwing, jeug, sport, kuns en kultuur op hul bedieners te huisves, volgens hom. Tans is die verkryging van goedkeuring sy grootste uitdaging, met staatskole wat huiwerig is om die stelsel sonder amptelike goedkeurig en leiding te gebruik. Twee staatskole is tydens ’n onlangse AI-beraad van die onderwysministerie op SIDS geregistreer. Skole kan tans SIDS gratis gebruik, maar vanaf 2027 word ’n bekostigbare intekengeld van N$1 000 per maand per skool beplan om voortgesette groei en volhoubaarheid te verseker. Die platform is tans webgebaseer en toeganklik vanaf enige toestel. ’n Stelsel vir leerlingplasings, veral vir graad 10 en 11, is ook deel van SIDS en vergemaklik die bestuur van aansoeke en beskikbare plekke. “Namibië het die potensiaal om sy eie tegnologiese oplossings te ontwikkel. Ek wil hê SIDS moet ’n voorbeeld wees van wat jong Namibiërs kan bereik wanneer hulle die geleentheid kry,” het Haindaka gesê. – loise@nmh-hub.com.na

Minder papier, meer onderrig

Kommentaar

Republikein 2026-10-20

Meld asseblief aan om kommentaar te lewer

Minder papier, meer onderrig

Kommentaar

Republikein 2026-10-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.