Laat indiening van fakture rede vir laat betalings

Die vertragings in die uitbetaling van studentetoelaes is veroorsaak deur universiteite wat eers fakture in April ingedien het, wat die regering genoodsaak het om eers maande in die akademiese jaar nie-klasgeldvoordele te begin verwerk. 

Só het die minister van onderwys, vernuwing, jeug, sport, kuns en kultuur, Sanet Steenkamp, gesê.

Sy het gesê hoewel die regering suksesvol registrasie- en klasgelde aan die begin van die akademiese jaar betaal het, moes universiteite en beroepsopleidingsentrums fakture vir nie-klasgeldvoordele ingedien het.

“Ons het eers die fakture van die instellings in April ontvang, want hulle was ook besig met registrasies tot einde Maart,” het Steenkamp gesê.

Haar opmerkings het gekom nadat parlementslede Dinsdag kommer uitgespreek het oor studente wat uit hul verblyf gesit word, klasse misloop weens ’n gebrek aan vervoer en onsekerheid oor hul studies in die gesig staar, aangesien betalings onder die gesubsidieerde tersiêre onderwysbefondsing (STEF)-model steeds uitstaande is.

Sy het bygevoeg dat die regering duisende aansoeke hanteer wat verifikasie vereis voordat betalings vrygestel kan word.

Sy het verder gesê die regering het reeds aan die begin van die jaar N$156 miljoen vooruit aan instellings betaal sonder enige fakture, om te verseker dat studente kon registreer en instellings met hul bedrywighede kon voortgaan.

Sedertdien is ’n bykomende N$122 miljoen vir klasgeld- en registrasiekoste betaal, asook N$30 miljoen vir nie-klasgeldondersteuning vir sowat 6 436 aktiewe studente en N$3 miljoen vir uitstaande verpligtinge van die vorige akademiese jaar.

Die regering het ook N$247 miljoen in die stelsel ingespuit om studente-uitbetalings te bespoedig, met uitbetalings wat na verwagting vandeesweek sal begin.

UITDAGINGS

Steenkamp het gesê die ministerie en die Finansiële Hulpfonds vir Namibiese Studente (NSFAF) werk onder beduidende kapasiteitsbeperkings terwyl hulle implementeer wat sy as ’n historiese hervorming beskryf het, onder streng tydraamwerke.

“Ons kan nie wegskram van die feit dat die verifikasie van identiteitsdokumente van kritieke belang is nie. 

“Ons kry baie foute in dokumente wat deur studente ingedien word en dit moet geverifieer word voordat betalings verwerk word,” het sy gesê.

Die minister het die frustrasie onder studente en ouers erken, maar volgehou dat instellings versoek is om geraakte studente voortgesette toegang tot klasse, eksamens en akademiese uitslae toe te laat terwyl uitstaande betalings afgehandel word. 

Steenkamp het verder bekend gemaak dat die herintegrasie van NSFAF in die ministerie personeeltekorte blootgelê het, met slegs 13 hoof- administratiewe beamptes wat toekennings hanteer en 10 rekenmeesters wat verantwoordelik is vir die verwerking van betalings. 

Om die kwessie te takel, is 25 bykomende personeellede aangestel. Die ministerie ondersoek ook ’n geïntegreerde digitale stelsel wat NSFAF, hoëronderwysinstellings en die ministerie van binnelandse sake, immigrasie, veiligheid en sekuriteit verbind om verifikasie en omkeertye vir betalings te verbeter.

Sy het die parlement verseker dat alle uitstaande nie-klasgeldtoelaes vir kwalifiserende aktiewe studente teen middel Julie afgehandel behoort te wees. 

– [email protected]