Koshuis staan vir 12 jaar leeg

’n Skoolkoshuis van N$44 miljoen wat al langer as ’n dekade leeg staan, moet binne ’n maand oop wees.

Dié ultimatum kom van die eerste minister Elijah Ngurare ná ’n verrassingsbesoek aan die Hoërskool Pendukeni Ivula-Ithana in die Etayi-kiesafdelingskool in die Omusatistreek die naweek.

Ten spyte van miljoene wat aan die konstruksie bestee is, het die koshuis vir meer as 12 jaar ongebruik gebly.

“Party daarvan is gevandaliseer en die kinders gebruik dit nie, tog is dit ultramodern,” het Ngurare beklemtoon.

Die eerste minister het gesê hy het die minister van onderwys, vernuwing, jeug, sport, kuns en kultuur, 

Sanet Steenkamp, vooraf oor die besoek ingelig.

“Wat ons gevind het, is nie iets wat goed is nie en daarom het ons opdrag gegee dat dinge binne ’n tydperk van een maand reggestel moet word,” het hy gesê.

Ngurare het daarop gewys dat ouers sowat N$250 000 uit hul eie sakke bygedra het om die grond te bekom waarop die koshuis gebou is.

“Ons het dalk nie die hulpbronne om maan toe te gaan nie, maar die hulpbronne wat ons belê het, hoe klein dit ook al mag wees, moet benut word. 

“Uit liefde vir die Namibiese kind moet ons tegniese struikelblokke uit die weg ruim en menslikheid bo alles stel,” het hy gesê.

UITEINDELIK HOOP

’n Skoolwerknemer, wat op voorwaarde van anonimiteit gepraat het, het gesê die eerste minister se besoek het ’n keerpunt aangedui.

“Hy het met plaaslike leiers vergader, aandagtig geluister en, die belangrikste, opgetree. Hy het hom daartoe verbind dat hierdie geriewe binne ’n maand uiteindelik ons kinders sal dien. 

“Geen verdere verwaarlosing nie. Geen verdere wag nie,” het die werknemer gesê.

“Vir die eerste keer in jare is daar werklike hoop.”

’n Gemeenskapslid het opgemerk dat hulle desperaat gewag het dat die koshuis oopmaak.

“Meer as 11 jaar gelede het die gemeenskap van Onamhindi meer as N$250 000 ingesamel om grond te bekom om die skool met koshuisgeriewe op te gradeer. 

“Die naamgenoot het ook bygedra, en die regering het later meer as N$44 miljoen belê om ’n ultramoderne koshuis te bou,” het die persoon, wat ook verkies het om nie genoem te word nie, gesê.

“Tog het hierdie geriewe vir meer as ’n dekade ongebruik gestaan. 

“Ons leiers het gebel, briewe geskryf en selfs die media betrek, maar niks het verander nie.”

VERWAARLOSING

In Oktober verlede jaar het skoolhoof Victor Nanghama die langdurige vertragings in ’n onderhoud met NBC openlik gekritiseer.

“Ek noem dit sabotasie. Daar is geen manier dat amptenare in hul kantore kan sit en nie kom kyk hoe die gebou gebruik word of hoe die bouwerk vorder nie,” het hy destyds gesê.

Hy het die afwesigheid van toesig deur beplanners en senior amptenare bevraagteken.

“Miskien wag hulle om deur die skoolhoof geroep te word, of dalk het hulle vergeet waarvoor hulle aangestel is,” het hy gesê.

Nanghama het ook om ingryping deur senior regeringsleiers gevra.

“Ons versoek die minister en die eerste minister om te kom en self te sien. Miskien kan ons dan antwoorde kry. 

“Wanneer gaan die kinders intrek, wanneer gaan die beddens aankom, en wanneer gaan die skool geregistreer word?” het hy gevra.

Hy het ook logistieke uitdagings uitgelig waarmee personeel te kampe het om die geriewe in stand te hou.

“Hulle sê vir ons ons moet na die gebou omsien. Hoe kan ons dit doen as dit so groot is, ver van ons kantore af en ons nie eens hier woon nie?” het hy gesê.

“Net sekuriteitswagte is daar gestasioneer en hul verantwoordelikheid is beperk tot die monitering van die gebou.”

– [email protected]