Kind glo deur onderwyser mishandel

’n Prokureur van Sisa Namandje & Co. Inc. het ’n amptelike eisbrief namens ’n gesin van Rehoboth aan die skoolhoof van Rehoboth Primêre Skool en die minister van onderwys, vernuwing, jeug, sport, kuns en kultuur en gestuur ná bewerings dat ’n graad 5-leerling aan verbale beledigings, fisieke mishandeling en aanhoudende boeliegedrag by die skool onderwerp is.

Die brief skets ’n reeks voorvalle waarby ’n minderjarige leerlinge glo betrokke is, wat deur sy pa en wettige voog verteenwoordig word.

Volgens die prokureursbrief word skadevergoeding van N$100 000 vir emosionele en psigologiese leed, ’n openbare verskoning van die betrokke onderwyser en onmiddellike ingryping deur die onderwysministerie geëis.

Volgens die brief het die mees onlangse voorval op 18 Februarie plaasgevind, toe die leerling glo tydens klas deur ’n onderwyser verbaal beledig en fisiek geslaan is. 

Die onderwyser word daarvan beskuldig dat hy die leerling “dom” voor sy maats genoem het, ’n boek na hom gegooi en hom met ’n sweep in die maag gestoot het.

Die voorval het die kind na bewering ontstel en verneder.

Die situasie het verder vererger het toe die leerling, oorweldig deur emosionele stres, glo die skoolterrein sonder gestruktureerde ondersteuning verlaat het en gedwing was om alleen per taxi huis toe te gaan.

“Dit gaan nie net oor een voorval nie,” het ’n bron aan Network Media Hub (NMH) gesê.

“Hierdie kind ly al lank en die stelsels wat hom moes beskerm, het gefaal.”

Die pa van die leerling het sy diepe frustrasie uitgespreek en beweer dat vorige boelievoorvalle waarby sy seun betrokke was, intern deur die skool sonder sy betrokkenheid hanteer is.

“Besluite is geneem sonder my, tog is ek die ouer. Dit is eenvoudig nie regverdig nie,” het hy gesê.

Die kind se ervarings sluit na bewering in dat hy in 2025 deur ’n ander leerling met ’n mes gejaag is. Tydens ’n afsonderlike konfrontasie het hy glo ’n blouoog opgedoen.

Alhoewel hierdie sake onder die aandag van die skoolowerhede gebring is, glo die ouer dat onvoldoende opgetree is, wat toegelaat het dat die situasie vererger.

“Wat hartverskeurend is,” het die pa bygevoeg, “is dat my kind nou in vrees skool toe gaan.

“Elke oggend hoop hy dat sy onderwyser nie iets doen wat hom seermaak of iets kwetsends vir hom sal sê nie. Die opgewondenheid en vreugde wat hy eens vir leer gehad het, het verdwyn,” het die pa gesê

NóG OUERS KOM NA VORE

Ander ouers het ook na vore gekom en beweer dat daar ’n patroon van onvanpaste gedrag deur dieselfde onderwyser is. Een ouer het beweer dat die onderwyser voorheen ’n Graad 5- of 6-meisie oor haar liggaam gespot het, terwyl ’n ander aangevoer het dat klagtes al vroeër ingedien is, maar dat geen betekenisvolle regstellende stappe gedoen is nie.

“Hulle probeer altyd alles intern oplos voordat dit die publiek bereik, net om die beeld van die skool te beskerm,” het ’n anonieme bron gesê.

Die regsverteenwoordiger voer aan dat die beweerde optrede ’n skending van die leerling se grondwetlike regte uitmaak, insluitend die reg op waardigheid soos vervat in Artikel 8 van die Grondwet, asook die verpligting dat administratiewe liggame billik en redelik moet optree ingevolge Artikel 18.

Die gesin beweer verder dat die kind sedertdien psigologiese ondersteuning benodig weens die trauma wat ervaar is. Hulle beklemtoon die langtermyn-impak wat sulke voorvalle op ’n jong leerling se welstand kan hê.

Onderwyskenners waarsku al lank dat onbeheerde boeliegedrag en wangedrag deur onderwysers verwoestende gevolge kan hê – nie net vir akademiese prestasie nie, maar ook vir ’n kind se emosionele ontwikkeling en gevoel van veiligheid.

“Hierdie saak is ’n wekroep,” het ’n gemeenskapslid gesê.

“Skole behoort veilige ruimtes te wees waar kinders versorg en beskerm word, nie omgewings waar hulle vrees ervaar nie.”

Die onderwysministerie is sewe dae gegun om op die brief te reageer. Indien geen bevredigende optrede volg nie, het die gesin aangedui dat hulle met siviele eise sal voortgaan.

– [email protected]