‘Kies die regte onderrigtaal’

Staatskole en onderwysowerhede op Walvisbaai is besig om voorbereidings te tref vir die inskrywingsproses van preprimêre en graad 1-leerlinge om te verseker dat aanstaande jaar se proses vlot verloop.Volgens die inspekteur van onderwys vir die Walvisbaai-kring, Theresia Goagoses, is inskrywings vir bogenoemde leerlinge op die hawedorp vir 29 tot 30 Junie geskeduleer. Goagoses sê die totale preprimêre inskrywings vir vanjaar is 437 leerlinge. Vooruitskattings vir 2027 dui egter op ’n afname tot 375 leerlinge, wat grootliks aan ’n tekort aan klaskamers toegeskryf kan word. Sy het na Seaside Laerskool as voorbeeld verwys, waar 56 leerlinge vanjaar in twee preprimêre klasse ingeskryf is, met ’n vooruitskatting van 50 leerlinge vir 2027.Ander skole weerspieël soortgelyke tendense. !Nara Laerskool huisves tans 70 leerlinge oor drie groepe, maar dit sal aanstaande jaar tot twee groepe van 50 leerlinge elk verminder word. Flamingo Laerskool het tans 56 preprimêre leerlinge, wat na verwagting effens tot 52 sal daal. By Narraville Laerskool word die huidige 52 na 50 leerlinge verminder.Kuisebmond Laerskool bied tans nie preprimêre onderrig aan nie weens ’n gebrek aan klaskamers. J.P. Brand Laerskool het ook nie ’n preprimêre klas nie, hoewel ’n nabygeleë sentrum voorsiening vir 30 leerlinge maak. Vir graad 1 het die kring ’n totale inskrywingsyfer van 2 074 leerlinge in 2026 aangeteken. Volgens Goagoses berei skole reeds voor vir aanstaande jaar deur rekening te hou met huidige graad 1-leerlinge, geprojekteerde herhalers asook preprimêre leerlinge wat na die volgende graad vorder.In dié verband het Seaside Laerskool reeds 91 leerlinge vir graad 1 in 2027 aangeteken, terwyl Tutaleni Laerskool 83 en High Hope Laerskool 75 vir aanstaande jaar het. Kuisebmond Laerskool, wat nie preprimêre klasse het nie, het tans net 26 leerlinge wat volgende jaar vir graad 1 voorspel word.Gaogoses sê ten spyte van hierdie syfers het die kring tans net 1 106 beskikbare plekke vir 2027, wat op ’n tekort dui wat bykomende beplanning en plasingsstrategieë sal vereis.Die kring bied sewe onderrigmediums aan wat Khoekhoegowab, Oshindonga, Oshikwanyama, Afrikaans, Engels, Otjiherero en Rukwangali insluit.Ouers word aangeraai om die toepaslike onderrigtaal noukeurig te kies, aangesien alle vakke wat in die gekose taal aangebied word, saam met Engels as ’n vak waar van toepassing. Goagoses het ouers gewaarsku teen die inskrywing van kinders in tale wat hulle nie magtig is nie, in ’n poging om plasing te verseker. Volgens haar ontwrig dit beplanning en kan dit ander leerlinge benadeel. “Ouers moet eerlik wees wanneer hulle ’n onderrigmedium kies. Om ’n kind in ’n taal in te skryf wat hulle nie verstaan nie, skep later uitdagings en neem geleenthede van ander weg,” het sy gesê.Vir toelating vir aanstaande jaar word ’n gesertifiseerde afskrif van die kind se geboortesertifikaat of, alternatiewelik, ’n doopsertifikaat, polisieverklaring, mediese kaart of ’n verklaring van plaaslike owerhede vereis.Ouers moet ook twee onlangse paspoortgrootte foto’s van die kind, bewys van verblyf en ’n gesertifiseerde afskrif van die ouer of voog se identifikasiedokument indien.Die ministerie van onderwys, vernuwing, jeug, sport, kuns en kultuur het ’n standaardtarief van N$10 vir aansoeke. Volgens Goagoses is dit om aansoektariewe te standardiseer, nadat sommige skole voorheen aansienlik hoër inskrywingsgelde gehef het. “Hierdie fooi dra by tot administratiewe koste en ondersteun skole in ooreenstemming met die onderwyswet se bepalings oor ouerlike verantwoordelikheid,” het sy verduidelik. Ouers wie se kinders nie by die skole van hul voorkeur geplaas is nie, sal deur ’n gesentraliseerde rekordhoudingstelsel by die kringkantoor ondersteun word. “Ons sal verseker dat geen kind agtergelaat word nie. Ek moedig ouers aan om te verseker dat alle nodige dokumentasie betyds ingedien word,” het Goagoses gesê. Die onderwysministerie het ’n beperking van 25 leerlinge per klas vir preprimêre grade. – republikein@republikein.com.na

‘Kies die regte onderrigtaal’

Kommentaar

Republikein 2026-06-16

Meld asseblief aan om kommentaar te lewer

‘Kies die regte onderrigtaal’

Kommentaar

Republikein 2026-06-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.