Kavango-Wes ervaar gebrek aan onderwysinfrastruktuur

Die goewerneur van die Kavango-Wesstreek het kommer uitgespreek oor die streek se volgehoue infrastruktuuruitdagings in onderwys, ten spyte van onlangse akademiese suksesse.In goewerneur Verna Sinimbo se streekrede wat sy Vrydag gelewer het, het sy gesê 29 skole het steeds nie permanente strukture nie, 35 het geen elektrisiteit nie, 12 het nie toegang tot water nie en 20 is erg vervalle en benodig opknappings- en opgraderingswerk.“Ons sal voortgaan om die ministerie van onderwys te betrek vir bykomende beleggings in klaskamers, koshuise, laboratoriums en vir skoolmeubels,” het Sinimbo belowe.Ten spyte van hierdie uitdagings, was Kavango-Wes nietemin die toppresterende streek in die Nasionale Senior Sekondêre Sertifikaat Gevorderde Vlak (NSSCAS)-eksamenuitslae en tweede in die Gewone Vlak (NSSCO)-uitslae in 2024.Sinimbo het dit aan “die toewyding van ons opvoeders, die vasberadenheid van ons leerlinge en die standvastige ondersteuning van ons gemeenskappe” toegeskryf.Sy het egter gewaarsku dat gebrekkige skoolinfrastruktuur hierdie vordering bedreig.Tussen 2024 en vroeg in 2025 het die streek 68 nuwe klaskamers, drie ablusieblokke en twee watertenkplatforms by verskeie skole gebou, insluitend Laerskool Arawak, Laerskool Ruurumwe, die Gekombineerde Skool Alisha en die Sekondêre Projekskool Nkurenkuru.Tog bly ontwikkeling agter die behoeftes van die streek se oorwegend landelike bevolking van meer as 123 000.VOORUITGANGOm dié tekortkominge te takel, word twee nuwe koshuise vir die Sekondêre Skool Daniel Sitentu en die Gekombineerde Skool Sharukwe beplan.Terselfdertyd word inligting en kommunikasietegnologie en hulpbronsentrums vir die Ncamagoro- en Nzinze-onderwyskringe oorweeg, het die goewerneur gesê.Sinimbo het vennote soos die Namib Desert Diamonds (Namdia) en die Namibia Fish Consumption Promotion Trust bedank vir hul finansiering van klaskamers in die streek.Sinimbo het ook aangekondig dat fases 1A en 1B van die Nkurenkuru-beroepsopleidingsentrum byna voltooi is, met die eerste inname van studente wat in Januarie 2026 verwag word.In vroeë kinderontwikkeling is ’n vroeëkinderontwikkelingsentrum van N$7,5 miljoen in 2024 by die Bravo-nedersetting geopen en 82 onderwysers is by dié staatskema gevoeg, wat die streektotaal tot 165 verhoog, het Sinimbo bygevoeg.“Hierdie inisiatief word waardeer en ons doen ‘n beroep op die ministerie om meer onderwysers by te voeg,” het sy gesê.– phillipus@nmh-hub.com.na

Kavango-Wes ervaar gebrek aan onderwysinfrastruktuur

Kommentaar

Republikein 2025-09-15

Meld asseblief aan om kommentaar te lewer

Kavango-Wes ervaar gebrek aan onderwysinfrastruktuur

Kommentaar

Republikein 2025-09-15

Meld asseblief aan om kommentaar te lewer

MELD AAN

Advertensie