‘Doen meer met minder’

Henriette Lamprecht - “Ek erken en neem kennis van die moeilike omstandighede waarin ons almal werk en in veral die gebrek aan onderwysers en die leerlinge in die noordelike dele wat geraak word deur vloede. Ons onderwysers en leerlinge landswyd wat steeds sonder ordentlike klaskamers en voldoende onderrigmateriaal is.”

Maar, sê die minister van onderwys, kuns en kultuur, Anna Nghipondoka, “laat ons prioritiseer om die beste uitkoms te verseker uit die min hulpbronne tot ons beskikking”.

Volgens die minister is die onderwyssektor die afgelope vyf jaar en terwyl dit hervormings implementeer het, getref deur van droogtes en ’n ekonomiese afswaai. Dit het gelei tot ’n afname van hulpbronne in ’n tyd wat die sektor dit die nodigste gehad het en het weer ’n negatiewe impak op hervormingsplanne gehad. Implementering is gekortwiek deur tekorte aan klaskamers, koshuise, onderrigmateriaal en personeel met min tot geen aandag wat geskenk is aan die voortgesette professionele ontwikkeling van onderwysers nie.

Volgens Nghipondoka is die ministerie egter op die punt om die voorstelle van die nasionale onderwyskonferensie verlede jaar te implementeer. Pogings word ook aangewend om te herstel van die letsels wat die Covid-19-pandemie in terme van omvattende vaardighede en kennis op die sektor gelaat het.

Met verwysing na die uitslae van verlede jaar se Nasionale Senior Sekondêre Sertifikaat Gewone asook Gevorderde vlak (NSSCO/NSSCAS)-eksamens sê die minister dit is deeglik ontleed met onmiddellike en geteikende ingrypings wat op alle vlakke uitgevoer word.

Nghipondoka het weer beklemtoon alles sal gedoen word met die minimum hulpbronne wat tot die ministerie se beskikking is. Sy het gemaan dit beteken meer innovering en inisiatief “om meer met minder te doen”, verantwoordbaarheid, werksetiek, deursigtigheid, integriteit, deelname en doeltreffendheid.

Nghipondoka het die voldoende koördinering tussen hoofkantoor en streekkantore beklemtoom om onder meer die spoedige verskaffing van hulpbronne te verseker.

Sy het ’n waarskuwing gerig aan personeel wat op die rug van ander ry om ernstig hul werksetiek en toewyding te ondersoek.

“Vra jouself wat kan ek doen om te verbeter. Is ek die waarde van my vergoeding aan die einde van elke maand werd? Het jy al ooit gedink om ’n werk as ’n staatsamptenaar te hê, is nie ’n reg nie, maar ’n voorreg wat jy moet koester. Iewers daar buite is daar iemand wat beter gekwalifiseerd is en beter vaardighede het, maar weens omstandighede nie die voorreg het wat jy het nie.”

Nghipondoka sê personeel moet ’n nuwe manier van dink en doen skep “omdat ons eenvoudig nie met dieselfde pas en met dieselfde houding kan voortgaan nie”.

– [email protected]