Buitelander hoofverdagte in vraestel-skandaal
Ministerie stel Braille-kundige aan
Al die vakke se vraestelle is aan die hoofverdagte tydens die brailleproses openbaar gemaak.
Die hoofverdagte in die uitlek van vraestelle vir graad 11’s en 12’s verlede jaar is ’n buitelandse kundige in brailleskrif.
Dit het die ministerie van onderwys, kuns en kultuur miljoene Namibiese dollar gekos om die eksamens noodgedwonge na die begin van vanjaar te verskuif.
Die ministerie het die verdagte aangestel om die betrokke vraestelle in brailleskrif om te skakel. Die vraestelle was vir gesiggestremde kandidate bestem.
Die minister van onderwys, kuns en kultuur, me. Anna Nghipondoka, het in die Nasionale Vergadering (NV) gesê die persoon is saam met nog twee verdagtes in Windhoek in aanhouding.
Drie strafregtelike klagte, twee in Ongwediva en een in Ondangwa, is aanhangig gemaak ná die diefstal. Teen 1 Desember is 10 verdagtes in hegtenis geneem waarvan agt op borgtog vrygelaat is, terwyl twee (buitelanders) in aanhouding bly.
Nog ’n buitelander wat met die diefstal verbind word, het intussen spoorloos verdwyn. In ’n verdere deurbraak is nog ’n Namibiër vasgetrek wat tans in aanhouding is.
“Almal wat tans in aanhouding is, het reeds in die hof verskyn en is borgtog geweier. Weens die voortgesette polisieondersoeke kan die ministerie nie meer inligting verskaf nie, omdat dit die ondersoek kan belemmer,” het Nghipondoka gesê.
In ’n poging om die integriteit van die kwalifikasies te beskerm, is besluit om die eksamens vir graad 11 en graad 12 (AS) vanjaar te herhaal.
Vir graad 12 gewone vlak is vyf vakke oorgeskryf, en 10 vakke se vraestelle vir graad 11 gewone vlak. Die herskryf van vraestelle was ten spyte daarvan dat bewyse van die uitlek van vraestelle tydens ’n ondersoek net by drie graad 12- en een graad 11-vak gevind kon word.
“Omdat al die vakke se vraestelle aan die hoofverdagte tydens die brailleproses openbaar gemaak is, het ons in samewerking met ons akkreditasievennoot, Cambridge Assessment International Education, besluit dit moet alles herskryf word,” het die minister gesê.
Nghipondoka het verduidelik die direktoraat vir nasionale eksamens en evaluering stel vraestelle twee jaar vooruit op. Daarom was reserwevraestelle reeds beskikbaar en moes dit net gedruk word.
Skole het ook vroeër gesluit om streke te help om voor te berei vir die voortsetting van die nasionale eksamens in die huidige skooljaar. Die hervatting van klasse vir gevorderde vlak (AS)-kandidate is ook uitgestel tot ná die vrystelling van die gewone vlak uitslae môre.
Die besluit om die hervatting van klasse vir vanjaar se graad 11-leerlinge tot 24 Januarie uit te stel, is volgens die minister geneem om te verseker skole het eksamenlokale beskikbaar en ook om ruimte in koshuise beskikbaar te stel vir graad 11 gewone vlak-kandidate wat hier gehuisves moet word.
Nghipondoka het weer eens die versekering gegee die integriteit van die eksamens en kwalifikasies is geensins in gedrang nie.
Volgens haar sal die ministerie verseker dat die bestaande veiligheids- en beheermaatreëls verbeter en noukeurig gevolg word.
Sy het verwys na die reusetaak wat die aanstelling van personeel met “uitstaande waardes en integriteit” vereis.
Die ministerie gaan nou ’n ontleding van gapings in beheermaatreëls doen, terwyl ’n evaluering van die risiko’s ook gedoen is om dié gapings te sluit.
Die minister het gemaan dis ’n strafregtelike oortreding en ’n oortreding van die onderwyswet om vraestelle te steel en vertroulike inligting met betrekking tot nasionale eksamens met ’n ander party te deel. – [email protected]
Dit het die ministerie van onderwys, kuns en kultuur miljoene Namibiese dollar gekos om die eksamens noodgedwonge na die begin van vanjaar te verskuif.
Die ministerie het die verdagte aangestel om die betrokke vraestelle in brailleskrif om te skakel. Die vraestelle was vir gesiggestremde kandidate bestem.
Die minister van onderwys, kuns en kultuur, me. Anna Nghipondoka, het in die Nasionale Vergadering (NV) gesê die persoon is saam met nog twee verdagtes in Windhoek in aanhouding.
Drie strafregtelike klagte, twee in Ongwediva en een in Ondangwa, is aanhangig gemaak ná die diefstal. Teen 1 Desember is 10 verdagtes in hegtenis geneem waarvan agt op borgtog vrygelaat is, terwyl twee (buitelanders) in aanhouding bly.
Nog ’n buitelander wat met die diefstal verbind word, het intussen spoorloos verdwyn. In ’n verdere deurbraak is nog ’n Namibiër vasgetrek wat tans in aanhouding is.
“Almal wat tans in aanhouding is, het reeds in die hof verskyn en is borgtog geweier. Weens die voortgesette polisieondersoeke kan die ministerie nie meer inligting verskaf nie, omdat dit die ondersoek kan belemmer,” het Nghipondoka gesê.
In ’n poging om die integriteit van die kwalifikasies te beskerm, is besluit om die eksamens vir graad 11 en graad 12 (AS) vanjaar te herhaal.
Vir graad 12 gewone vlak is vyf vakke oorgeskryf, en 10 vakke se vraestelle vir graad 11 gewone vlak. Die herskryf van vraestelle was ten spyte daarvan dat bewyse van die uitlek van vraestelle tydens ’n ondersoek net by drie graad 12- en een graad 11-vak gevind kon word.
“Omdat al die vakke se vraestelle aan die hoofverdagte tydens die brailleproses openbaar gemaak is, het ons in samewerking met ons akkreditasievennoot, Cambridge Assessment International Education, besluit dit moet alles herskryf word,” het die minister gesê.
Nghipondoka het verduidelik die direktoraat vir nasionale eksamens en evaluering stel vraestelle twee jaar vooruit op. Daarom was reserwevraestelle reeds beskikbaar en moes dit net gedruk word.
Skole het ook vroeër gesluit om streke te help om voor te berei vir die voortsetting van die nasionale eksamens in die huidige skooljaar. Die hervatting van klasse vir gevorderde vlak (AS)-kandidate is ook uitgestel tot ná die vrystelling van die gewone vlak uitslae môre.
Die besluit om die hervatting van klasse vir vanjaar se graad 11-leerlinge tot 24 Januarie uit te stel, is volgens die minister geneem om te verseker skole het eksamenlokale beskikbaar en ook om ruimte in koshuise beskikbaar te stel vir graad 11 gewone vlak-kandidate wat hier gehuisves moet word.
Nghipondoka het weer eens die versekering gegee die integriteit van die eksamens en kwalifikasies is geensins in gedrang nie.
Volgens haar sal die ministerie verseker dat die bestaande veiligheids- en beheermaatreëls verbeter en noukeurig gevolg word.
Sy het verwys na die reusetaak wat die aanstelling van personeel met “uitstaande waardes en integriteit” vereis.
Die ministerie gaan nou ’n ontleding van gapings in beheermaatreëls doen, terwyl ’n evaluering van die risiko’s ook gedoen is om dié gapings te sluit.
Die minister het gemaan dis ’n strafregtelike oortreding en ’n oortreding van die onderwyswet om vraestelle te steel en vertroulike inligting met betrekking tot nasionale eksamens met ’n ander party te deel. – [email protected]
Kommentaar
Republikein
Geen kommentaar is op hierdie artikel gelaat nie