346 leerders by die huis weens vervalle toilette

Enzo Amuele – Leerlinge aan die Laerskool Oshukwa in die Omusatistreek se ouers weier om hulle kinders skool toe te stuur weens die vervalle toestand van die skool se ablusiegeriewe.

Volgens ’n verslag van die skoolhoof, Selma Uushona, is skole se ablusiegeriewe reeds vir jare in ’n vervalle toestand en versoeke vir nuwe fasiliteite is in Januarie 2013, Maart 2015 en Junie 2020 deur die beplanningsafdeling aan die onderwysdirektoraat in die Omusatistreek gerig.

Uushona het aan Republikein se susterkoerant, Namibian Sun, gesê ’n terreinoorhandiging aan Gate Trading BK het op 16 Desember 2020 plaasgevind en die konstruksie van ’n klein ablusiefasiliteit oor ’n tydperk van drie maande sou op dieselfde datum begin het.

“Die nuwe toilette was veronderstel om in Maart 2021 voltooi te wees, maar die maatskappy het versuim om die tenderooreenkoms na te kom wat gelei het tot die amptelike beëindiging daarvan in September 2022,” het sy gesê.

Die skool het verskeie oproepe aan amptenare van die beplanningsafdeling gerig om navraag te doen oor die pad vorentoe, wat tot dusver onbeantwoord gebly het.

OUERS BEKOMMERD

“Die ouers sê gereeld die toilette is onveilig en hou ’n bedreiging vir hul kinders se lewens in. Hulle het ook hul skok uitgespreek oor die toestand van die personeel se toilette,” het Uushona gesê.

Loide Iiyambo, een van die ouers, het gesê: “Ons wil hê ons kinders se klasse moet hervat, maar die situasie is ’n gesondheidsrisiko vir hulle.”

Uushona sê die inspekteur van onderwys, Eliakim Kamati, blameer haar omdat sy hom nie ingelig het dat die skool gesluit het nie.

Volgens Uushona het Kamati die skool besoek en gesê die toilette hou geen bedreiging vir mense se lewens in nie en dat hy geen rede kan sien waarom onderrig nie kan voortgaan nie. Volgens hom was die skool onwettig gesluit.

“Ek was nie van plan om die skool te sluit nie, maar dit was die ouers wat met hul kinders weggebly het,” het sy gesê.

“Die inspekteur was hier en het self die toilette gesien. Hy het volgehou dat die toilette nie ’n veiligheidsrisiko vir die leerlinge is nie. Hy het my verder gevra of iemand ingeval het,” het sy gesê.

Die skool het sedert 2015 tydelike toilette gebruik wat nie deure gehad het nie.

“Ons grawe al die afgelope vyf jaar putte en nou het ons nie meer plek op die skoolterrein waar ons kan grawe nie,” het sy gesê.

Die hoofwoordvoerder van die ministerie van onderwys, kuns en kultuur, Sem Shino, het gesê sy kantoor is nie bewus van die situasie nie.