13 450 skoolverlaters in 2025

Namibië se onderwysstelsel het verlede jaar 13 450 skoolverlaters uit altesaam 913 223 ingeskrewe leerlinge gehad.Volgens die ministerie van onderwys, vernuwing, jeug, sport, kuns en kultuur se adjunk- uitvoerende direkteur vir finansies en administrasie, Knox Otto Imbuwa, is meisies effens meer geraak as seuns – 6 884 meisies teenoor 6 576 seuns – wat volgehoue geslagsongelykhede in ’n stelsel uitlig wat onder druk van armoede, uitdagings met infrastruktuur en beleidsleemtes is.Hy het bevestig die totale nasionale inskrywings vir die akademiese jaar van 2025 het op 913 223 leerlinge gestaan, waarvan 848 159 in staatskole ingeskryf was en 65 064 leerlinge in privaat skole.Imbuwa het verlede week tydens ’n gesprek met die parlementêre staande komitee oor onderwys aangedui dat, uit die 848 159 inskrywings in staatskole, 422 244 (49%) seuns was en 425 915 (50,2%) meisies.“In privaat skole was uit ’n totaal van 65 064 leerlinge, altesaam 31 777 of 50,4% vroulik, terwyl 32 287 of 49,6% manlik was. Uit die totale inskrywings van 913 223 leerlinge het 13 450 of 1,47% die skool verlaat. Hiervan was 6 884 (51,1%) vroulik en 6 576 (48.9%) manlik,” het hy bevestig. “Die sluit beide privaat en staatskole in; die uittog in privaat skole is egter minder.”Imbuwa het uitgelig dat die streke met die hoogste skoolverlatingsyfers Ohangwena (1 758), Kavango-Oos (1 616) en Kavango-Wes (1 405) insluit, terwyl streke met die minste skoolverlaters ||Kharas (332) en Oshana (379) is.Onderwysstatistiek vir 2024 het verder onthul dat skoolverlating ’n uitdaging oraloor Namibië bly, met duisende leerlinge wat die onderwysstelsel voortydig verlaat.Volgens die syfers het Ohangwena die hoogste aantal skoolverlaters aangeteken met 1 741 leerlinge, gevolg deur Kavango-Oos (1 562), Oshikoto (1 347) en Kunene (1 385). Ander streke met noemenswaardige syfers sluit Omaheke (1 291) en Kavango-Wes (1 271) in. Khomas, die tuiste van die hoofstad, het 990 leerlinge gerapporteer wat die skool verlaat het, terwyl kleiner totale in Hardap (568), Erongo (484) en ||Kharas (310) aangedui is.Imbuwa het gesê die syfers weerspieël ’n ingewikkelde mengsel van sosioëkonomiese, infrastruktuur- en beleidsverwante uitdagings.“Daar is talle kwessies. . . Dis nie net een faktor wat tot die uitval bydra nie,” het hy gesê en vinger na armoede, geografiese struikelblokke en sistemiese tekortkominge gewys.Hy het meisies se menstruasie as ’n kernbekommernis uitgelig en opgemerk dat sowat 14% van meisies skool misloop weens ’n gebrek aan sanitêre produkte, ondanks regeringsingrypings om kwesbare leerlinge te ondersteun.Water- en sanitasie-uitdagings, veral by afgeleë skole, asook vervalle infrastruktuur, beïnvloed steeds leeromstandighede. Imbuwa het gewaarsku dat swak sanitasiegeriewe “nie bevorderlik vir meisies is nie,” wat tot afwesigheid en skoolverlating bydra.SWANGERSKAPPESwangerskappe bly ’n landswye uitdaging. Hoewel die beleid swanger leerlinge toelaat om skool tot die geboorte by te woon, stuur sommige skole hulle steeds voortydig huis toe.Armoede dryf steeds syfers, met baie leerlinge wat nie gereelde maaltye kan kry nie. Die nasionale skoolvoedingsprogram, wat hoofsaaklik laerskoolleerlinge ondersteun, strek nie tot hoërskole nie, wat baie kwesbares ná die oorgang onbeskermd laat.“Ons het kinders wat nie in staat is om maaltye te hê nie,” het Imbuwa gesê. Hy het bygevoeg dat die regering maniere ondersoek om voedingsondersteuning tot sekondêre vlak uit te brei, ondanks kostebeperkings.Infrastruktuurtekorte stel leerlinge ook bloot aan lang en onveilige reise, veral in streke soos die Zambezi en Kunene. Imbuwa het verwys na ’n onlangse voorval in Zambezi waar ’n leerlinge noodlottig deur ’n voertuig getref is terwyl hy vroeg skool toe gereis het.GEESTESGESONDHEIDOndersteuning vir geestesgesondheid is steeds beperk, met ’n ernstige tekort aan lewensvaardighede-onderwysers. “Die verhouding is omtrent een onderwyser vir sowat 1 000 leerlinge,” het hy gesê en die druk op beskikbare personeel beklemtoon.Onderwysminister Sanet Steenkamp het twee maande gelede gewaarsku oor stygende vlakke van skoolverlaters, die situasie as “diep kommerwekkend” beskryf en gevra vir dringende, gekoördineerde optrede om leerlinge op die skoolbanke te hou.Steenkamp het die opmerkings tydens die onderwysstreekkonferensie en die bekendstelling van die akademiese jaar gemaak, waar sy skole, ouers, tradisionele leiers en maatskaplike werkers aangespoor het om saam te werk om in te gryp in die groeiende aantal leerlinge wat skool verlaat voordat hulle basiese onderwys voltooi.Sy het gemeenskappe daaraan herinner dat die Namibiese Grondwet en die Wet op Basiese Onderwys van 2020 dit verpligtend maak vir kinders om in die skool te bly totdat hulle basiese onderwys voltooi of die ouderdom van 16 bereik.Ten spyte van hierdie wetlike vereiste, verlaat talle leerlinge skool weens armoede, tienerswangerskap, ’n gebrek aan ouerlike ondersteuning, lang afstande na skole, koshuisuitdagings en gedragskwessies.Onderwysleiers by die konferensie het die behoefte beklemtoon dat skole vroeë-waarskuwingstelsels moet versterk om leerlinge te identifiseer wat die risiko loop om uit te val.Ouers en koshuisowerhede is aangespoor om bywoning noukeurig te monitor en langdurige afwesigheid aan te meld, terwyl mobilisering in gemeenskappe, psigososiale ondersteuning en sterker afdwinging van bywoningsregulasies as kerningrypings uitgelig is.“Die gehalte van ’n onderwysstelsel kan nie die gehalte van sy onderwysers en skoolleiers oorskry nie,” het Steenkamp gesê.Toe sy afgevaardigdes by die onderwyskonferensie in Otjozondjupa in Februarie toegespreek het, het Steenkamp ook kommer uitgespreek oor die hoë skoolverlatingsyfers en onderwysamptenare gemaan om staat te maak op akkurate data, eerder as oor die oorsake.Die adjunk- uitvoerende direkteur vir skole/formele onderwys, Edda Bohn, het gesê gevalle is nou gekoppel aan hoe data ingesamel en opgevolg word, met skole wat reeds probeer om leerlinge deur uitreikprogramme terug na die skoolbanke te bring.“Die kwessie van leerlinge wat skool verlaat, begin by hoe ons data versamel oor die redes vir skoolverlating,” het sy gesê. “Ons versamel reeds hierdie inligting en skole doen moeite om leerlinge terug te bring. Daarbenewens voer die ministerie uitreik-inisiatiewe uit, soos toelatingsveldtogte om leerlinge aan te moedig om terug te keer skool toe.”Bohn het beklemtoon dat etiek, waardes en sedes kern bly, geanker in die benadering van ’n volle skoolloopbaan onder die veilige skole-raamwerk.Parlementslid van die Affirmative Repositioning (AR), Tuhafeni Kalola, het kommer uitgespreek dat skoolverlating onder seuns toenemend aan dissiplinêre stelsels gekoppel is, eerder as slegs ekonomiese swaarkry. Hy het gewaarsku dat skorsing en alternatiewe strawwe dikwels nie daarin slaag om leerlinge terug skool toe te bring nie.– nikanor@nmh-hub.com.na

13 450 skoolverlaters in 2025

Kommentaar

Republikein 2026-04-29

Meld asseblief aan om kommentaar te lewer

13 450 skoolverlaters in 2025

Kommentaar

Republikein 2026-04-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.