Water vir Afrika

Water is ’n dringende besprekingspunt in Namibië en in die res van Afrika.“Die ekonomiese waarde van water is onvervangbaar en ons weet geen sosioëkonomiese ontwikkeling is moontlik sonder water nie.” So het die minister van landbou, water en grondhervorming, mnr. Calle Schlettwein, Donderdag by die Afrika Ministersraad op Water (AMCOW), ’n subkomitee van die Afrika-unie se gespesialiseerde tegniese komitee op landbou, landelike ontwikkeling, water en die omgewing, gesê.Ongeveer 15 ministers van verskeie lande in Afrika het in Windhoek byeengekom om die nuutste voorstelle van AMCOW te oorweeg. By die openingsrede verlede Maandag, het die uitvoerende direkteur van sy ministerie, me. Ndiyakupi Nghituwamata, gesê dit is die eerste keer sedert die uitbreking van die Covid-19-pandemie dat deelnemers fisiek kan vergader. Schlettwein sê die vergadering word op die regte tyd gehou, aangesien 2022 reeds gekenmerk word deur verwoestende waterverwante rampe op die vasteland.Die tropiese sikloon Ana het in Januarie ’n nasleep van verlies en vernietiging aan kritieke infrastruktuur in Malawi agtergelaat.In April het swaar reën Kwazulu-Natal in Suid-Afrika gebombardeer en skade van meer as US$1,5 miljard aangerig. Oorstromings in Kameroen het die lewens van tienduisende mense onherroeplik beïnvloed. In Mali het riviere wat se walle oorstroom het, wydverspreide skade in die Moptistreek aangerig, en in Niger het stortreënval en oorstromings honderdduisende mense geraak, met aansienlike lewensverliese. “Die natuur het soortgelyke verlies en skade weens vloede in die Republieke van Guinee, Sierra Leone, Kongo Brazzaville, Mauritanië en Uganda aangerig,” het hy gesê.Verder het waterrampe ook kragopwekking in Suid-Afrika, Malawi, Nigerië en Senegal opgeskort, terwyl tot 20 miljoen mense in Djiboeti, Ethiopië, Kenia en Somalië weens droogte onder hongersnood gebuk gaan, volgens Schlettwein. “Ons moet optree om die billike beskikbaarheid van water vir alle doeleindes te verseker, en sanitasie vir almal. Dringende antwoorde word vereis,” sê hy.Spesifiek moet swak institusionele kapasiteit getakel word, en tweedens is dringende besigheidsin nodig om beleggings in waterinfrastruktuur te lok, sê hy. Toegang tot skoon water en veilige sanitasie skep die klimaat vir belegging wat ekonomiese groei bring, het hy agterna aan Republikein verduidelik. Water moet prioriteit geniet, het hy aan sy medeministers gesê.Die raad van ministers word gevra om die waterkwessie se plek in klimaatonderhandeling te verseker, om die sanitasie-ekonomie te bevorder, om die leweringstelsels vir die bestuur van veilige sanitasie- en higiëniese dienste te ondersteun, om grondwaterbestuur in die soeklig te plaas, en om gesamentlike Afrika-denkwyses rakende water en sanitasie by wêreldgeleenthede te verdedig.Die 13de vergadering van die raad se uitvoerende komitee het ook onder meer die ministers se goedkeuring van ŉ driejaarwerksplan ter waarde van US$20 miljoen gevra. AMCOW het reeds US$10 miljoen daarvoor ingevorder, volgens mnr. Rashid Mbaziira, uitvoerende sekretaris van die ministersraad. Hy sê die raad bring al die ministers verantwoordelik vir water op die vasteland bymekaar, “om die vasteland se beleid op die bestuur van ons waterhulpbronne te vestig, en ook op die voorsiening van watertoevoer, sanitasie en higiëniese dienste.” – augetto@republikein.com.na

Water vir Afrika

Kommentaar

Republikein 2025-11-04

Meld asseblief aan om kommentaar te lewer

Water vir Afrika

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.