Tsumeb – waar ‘reuse’ seil

’n Yslike luislang wat na raming langer as 5 meter is, is onlangs by die Damara Dik Dik Safaris Lodge raakgeloop – ’n jagplaas wat sowat 20 kilometer buite Tsumeb geleë is. Dana de Kock, ’n plaasbestuurder, het vertel hy en werkers het aanvanklik net die sleepsel by een pos opgemerk en dit gevolg, waarna hulle op die slang afgekom het. De Kock sê alhoewel hy nie die slang kon meet nie, skat hy dit was tussen vyf en ses meter lank. Die reuseslang is weer veilig vrygelaat nadat ’n foto van hom geneem is.Dit is die derde reuseluislang wat die afgelope 20 jaar op die plaas gevind is, het Julio Lopes, eienaar van die lodge, aan Republikein vertel. Hy sê in 2004 of 2005 het hy op ’n dooie luislang afgekom wat sowat vyf meter lank was en moes gevrek het terwyl hy besig was om ’n springbok in te sluk. Lopes vertel dit was in Mei en dit het skielik begin reën. Hy vermoed die skielike koeler temperature het moontlik tot dié slang se dood gelei. Lopes het egter die luislang se vel gehou. Daarna het hy op nog ’n groter luislang afgekom. “Die slang was opgerol, maar die opgerolde hoop wat hy gevorm het, was seker ’n meter breed en ’n meter lank,” het Lopes gesê. Hy skat dat die slang minstens 5,5 meter lank was. Dit was in 2011. Lopes sê hulle pas die groot slange op die lodge goed op en dat dit indrukwekkend is om die besonderse reptiele in die natuur te kan raakloop. “Ons sien in die algemeen baie luislange hier, maar hulle is gemiddeld sowat twee meter lank en so dik soos ’n mens se voorarm,” het hy verduidelik. Hy sê volgens wat hy opgelees het, is sulke uitsonderlike groot luislange gemiddeld sowat 15 jaar oud. “By ons kom daar ook die skaars dwergluislang voor – wat meestal sowat ‘n meter lank is. Ons kry hoofsaaklik luislange en pofadders hier, af en toe ’n swart mamba en dikwels sebraslange,” het Lopes gesê. De Kock, wat homself as ’n slangliefhebber beskryf het wat nooit onnodige kanse vat nie, sê ook dit is die grootste luislang waarop hy tot dusver afgekom het. – elvira@republikein.com.na

Tsumeb – waar ‘reuse’ seil

Kommentaar

Republikein 2026-02-04

Meld asseblief aan om kommentaar te lewer

Tsumeb – waar ‘reuse’ seil

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.