Trein na Sossusvlei

Om ’n moderne trein tussen die duine te sien ry, klink dalk soos ’n hersenskim, maar dié plan van mnr. Laban Kandume, eienaar van Sky Eye Tours & Hospitality, het reeds die ja-woord van die minister van die omgewing, bosbou en toerisme, mnr. Pohamba Shifeta, ontvang. Shifeta het reeds is Maart 2020 die konsessieregte aan Sky Eye Tours & Hospitality vir die “vasgemaakte heliumlugballon en ’n gemotoriseerde passasiervervoerstelsel” by Sossusvlei in die Namib-Naukluft Park gegee. Dit is op voorwaarde dat die Monumentbeskermingsraad geen besware het nie, Sky Eye Tours & Hospitality moet oor ’n omgewingsklaringsertifikaat (ECC) beskik en Namibia Wildlife Resorts (NWR) moet betrokke wees. Vir die goedkeuring van ’n omgewingsklaringsertifikaat word ’n omgewingsimpakstudie (EIA) benodig wat Green Earth Environmental Consultants nou opstel. Hulle het besonderhede hieroor onlangs in ’n inligtingstuk (BID) bekend gemaak. Die eerste openbare byeenkoms om die projek te bespreek, is vir 1 April om 10:00 by die Sossusvlei Lodge geskeduleer. As agtergrond word in die inligtingstuk genoem dat Sossusvlei ’n gewilde reisbestemming is. Voor die Covid-19-pandemie het tussen 1 000 en 1 500 toeriste daagliks die vlei besoek, wat oor die 600 000 toeriste per jaar is. Die pad vanaf Sesriem tot by die Sossusvlei-parkeerterrein is geteer, maar vir die laaste sowat vier kilometer tot by die vlei word ’n 4x4-voertuig benodig. “Daar is geen aangewese pad vanaf die parkeerterrein tot byvoorbeeld by Dooievlei nie en besoekers en die NWR-voertuie volg die rivier. Intussen is die voertuigbane tot 50 meter breed, wat ’n impak op die omgewing het,” luidens die verklaring. Dit is waarom Sky Eye Tours & Hospitality ’n “moderne vervoerdiens” wil bou – besoekers moet in die toekoms die laaste vier kilometer per trein kan ry. Die treinspoor sal vyf meter bo die grond op pilare gebou word. Loopplanke en platforms sal ook op verhoogde dekke geplaas word “om nie die natuurlike vloei van die rivier te steur nie.” Krag vir die trein sal deur twee kragopwekkers voorsien word. ’n Eenrigtingreis sal ongeveer 12 minute duur.Aan die einde van die spoorlyn, in Sossusvlei self, wil die maatskappy ’n vasgemaakte heliumgevulde lugballon installeer en bedryf. Toeriste kan dan van tot 150 meter bo die grond die vlei en die duine besigtig. ’n Kiosk en restaurant sal ook beskikbaar wees. Sedert die bekendmaking van die projek is weerstand veral van inwoners uit die omgewing en lodge-eienaars ontvang. Hulle beskryf die planne en die trein as ’n skande wat die onaangetaste natuurskoon negatief sal beïnvloed. Hulle argumenteer dat in ’n nasionale kultuurerfenis gebied soos Sossusvlei ’n ontwikkeling van die grootte nie mag plaasvind nie. Die bekommernis bestaan dat Sossusvlei sy natuurlike sjarme en flair sal verloor. – republikein@republikein.com.na

Trein na Sossusvlei

Kommentaar

Republikein 2025-05-01

Meld asseblief aan om kommentaar te lewer

Trein na Sossusvlei

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie