Tara versamel Atlantiese Oseaan se data

Die navorsingstuig Tara vaar vandag uit Walvisbaai om belangrike werk vir die bewaring van die wêreld se oseane voort te sit. Die seilvaartuig was oor die naweek in die hawe waar die bemanning begeleide toere aangebied het om hierdie drywende laboratorium aan belangstelles te wys.Die vaartuig – ryk aan geskiedenis – is op die laaste been van ’n epiese avontuur wat in Desember 2020 in Lorient, Frankryk, weggespring het en in Oktober vanjaar weer daar sal eindig. Die seilboot het Namibië bereik nadat meer as 53 000 km afgelê is en is besig met die laaste fase van die mikrobioom-studiesending van Afrika se weskus. Die seilskip is in 1989 gebou en onder andere deur die Franse doktor en ontdekkingsreisiger Jean-Louis Etienne die ‘Antarctica’ gedoop. Tien jaar later het die passievolle Nieu-Seelandse ekoloog Peter Blake dit gekoop en die naam tot ‘Seamaster’ verander. Hy is op 5 Desember 2001 deur seerowers doodgemaak terwyl hy op die Amasonerivier verandering van die omgewing gemonitor het.In 2003 het mnr. Étienne Bourgois die vaartuig gekoop, tot ‘Tara’ herdoop en die buitengewone seereise voortgesit.Mariene mikro-organismes is noodsaaklik in die oseaan en verteenwoordig meer as twee derdes van die mariene biomassa. Hulle is die eerste skakel in ’n groot voedselweb wat ’n groot deel van die mensdom voed. Vir die afgelope jaar-en-’n-half het die laboratoriumskip die Chileense, Karibiese, Brasiliaanse en Argentynse waters ondersoek en toe ’n missie in die Weddell See in Antarktika uitgevoer. Volgende sal die span wetenskaplikes sommige van die mees produktiewe seestreke op die planeet – die Benguela-stroom en die kus van Senegal – verder verken.Tussen 23 Junie tot 19 September is die volgende beplande stopplekke in Luanda, Matadi (DRK), by Pointe Noire (Kongo), Gambië se hoofstad Banjul en daarna Senegal se hoofstad Dakar.Die Tara Oseaanstigting se sending is deel van die Europese AtlantECO-projek, wat deur die Europese Kommissie gefinansier word en meer as 36 wetenskaplike instellings in Europa, Brasilië en Suid-Afrika byeenbring. Hierdie internasionale wetenskaplike samewerking streef na ’n gedetailleerde begrip van die kwessies wat met die Atlantiese Oseaan verband hou. AtlantECO sal die Atlantiese Oseaan deurkruis met ses hoofekspedisies. Tydens hierdie ekspedisies sal wetenskaplikes die funksionering en sirkulasie van die mariene mikrobioom bestudeer, en ook die impak van plastiek en chemiese besoedeling en klimaatsverandering ontleed. “Met hierdie ekspedisie wil ons samewerking met Afrika se wetenskaplike gemeenskap bewerkstellig en die data deel wat opgelewer sal word. Die beskikbaarheid van wetenskaplike data is inderdaad ’n belangrike saak vir Afrika om die gesondheid van mariene ekosisteme op te neem en vir maatreëls om dit te beskerm,” het mnr. Romy Hentinger, direkteur van die voorspraakafdeling by die Tara Oseaanstigting in ’n vrystelling gesê.– augetto@republikein.com.na

Tara versamel Atlantiese Oseaan se data

Kommentaar

Republikein 2026-08-12

Meld asseblief aan om kommentaar te lewer

Tara versamel Atlantiese Oseaan se data

Kommentaar

Republikein 2026-08-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.