Strenger regulasies kom vir uitvoer van renosters

Terwyl meer as 40 renosters veilig vanaf Namibië na die Verenigde State van Amerika (VSA) in &#039;n private veiling uitgevoer is, wil die ministerie van die omgewing, bosbou en toerismestrenger regulasies vir die uitvoer van renosters instel.Die 42 witrenosters wat by Kifaru Luxury Lodge en Bush Camp naby Outjo gekoop is, het gister veilig in Texas, VSA, geland nadat hulle van die Hosea Kutako Internasionale Lughawe met &#039;n Boeing 747 vervoer is.Die renosters het glo Dinsdagmiddag die land verlaat.Jaco Muller van Kifaru lodge en die Rhino Momma Project het die verkoop bevestig en aan Kosmos 94.1 gesê die diere is by hom gekoop deur &#039;n wildhandelaar wat &#039;n Amerikaanse agent het en dat dit aan drie verskillende mense verkoop sal word.Die woordvoerder van die ministerie van die omgewing, Romeo Muyunda, het ook die verkoop aan Netwerk Media Hub (NMH) bevestig en gesê die prys van &#039;n lewende renoster word op N$500 000 geraam.“Die bedrae wat in die mediaberigte genoem word, is dieselfde as wat ons van die handelaar ontvang het. In Namibië kan enigeen die veilingspryse gaan kyk, en daardie pryse wat die regering noem is nie naby daardie bedrag nie,” het Muller gesê.Muller kon nie deur NMH vir kommentaar bereik word nie.Sy vrou Cher het egter gister op Facebook geplaas dat sy &#039;n paar punte wil uitklaar.“Tans beleef Namibië ’n droogte, en ons fokus daarop om ons renosters te voed en te bewaar, nie om jong bulle uit te voer vir jag nie.”Sy het ook gesê die meerderheid renosters wat na die VSA gestuur word—sowat 95%—koeie is, met &#039;n kleiner persentasie bulle.Cher het beklemtoon dat die uitvoer van renosters, veral vir jag, onderhewig is aan streng regulasies ingevolge die Konvensie oor Internasionale Handel in Bedreigde Spesies van Wilde Fauna en Flora (CITES).Namibië is &#039;n ondertekenaar van CITES, wat internasionale reëls stel vir die handel in bedreigde spesies, insluitend renosters.Sy het gesê witrenosters van Namibië word oor die algemeen onder Bylaag II van CITES gelys. Dit beteken die diere kan internasionaal vir spesifieke doeleindes verhandel word, insluitend lewende diere en jagtrofeë, maar slegs met behoorlike permitte van beide die uitvoer- en invoerlande.“CITES laat nie die onbeperkte handel in witrenosters toe nie, en enige uitvoer moet voldoen aan die vereistes wat verseker dat die handel nie die spesie se voortbestaan benadeel nie.”Volgens haar word swartrenosters, wat meer bedreig is, onder Bylaag I gelys, wat beteken dat handel in dié diere swaar beperk word en oor die algemeen slegs onder buitengewone omstandighede toegelaat word (bv. vir bewaringsdoeleindes).“In beide gevalle, as die renosters uitgevoer word as deel van ’n jag- of lewende handelsooreenkoms, moet gewys word dat hierdie handel nie die bevolking negatief sal beïnvloed nie.”Cher het verder gesê dat die VSA ook CITES-riglyne volg en sy eie regulasies het deur die Wet op Bedreigde Spesies (ESA).Sy het gesê dat die invoer van renosters (hetsy vir lewende handel of jagtrofeë) deur beide CITES en die Amerikaanse Vis- en Natuurlewediens (FWS) goedgekeur moet word.“In Namibië word renosterbewaring versigtig bestuur, en jagkwotas word op grond van bewaringsbehoeftes vasgestel. Witrenosterjag word onder baie beperkte omstandighede toegelaat, en gewoonlik behels dit ouer, nie-telende bulle.”Volgens Cher is die uitvoer van renosters, veral koeie, vir lewende handel of om bewaringspogings in ander lande (soos die VSA) meer algemeen, en jag van hierdie uitgevoerde renosters of hul nageslag sal nie ingevolge CITES toegelaat word as dit uitgevoer word vir nie-jag doeleindes nie.“As die diere vir ander doeleindes as jag (soos lewende handel of bewaring) uitgevoer word, sal CITES-regulasies hul jag verbied.”Cher het voorts gesê volgens CITES-riglyne mag geen van hierdie uitgevoer diere of hul nageslag gejag word nie, tensy hulle onder &#039;n spesifieke permit vir jagdoeleindes uitgevoer word, wat blykbaar nie die geval is in Namibië se huidige bewaringspogings nie.Die president van die Namibiese Professionele Jagtersvereniging (Napha), Axel Cramer, het aan NMH gesê hulle is nou al etlike maande bewus van die verkoop van die renosters.“Ons stem nie saam daarmee nie, want dit is Afrika-wild wat in Afrika moet bly.” Hy het egter gesê dat hulle ook verstaan dat mense soms geen ander keuse het nie, omdat hulle nie met renosterhorings kan handel dryf nie en daarom moet hulle teenstropery verhoog.Muyunda het op sy beurt beklemtoon dat dit &#039;n private transaksie is en dat geen geld na die regering gaan nie.Hy het gesê die ministerie sal in die toekoms werk aan strenger regulasies vir die uitvoer van renosters buite die land wat verdere beperkings sal plaas. “Tot dusver ontbreek dit in die wet, maar daar is regulasies wat ons reeds begin opstel het om beperkings op die uitvoer van renosters te plaas.”Die aansoek om permitte om die renosters na Texas uit te voer, is reeds in Januarie gedoen. - ellanie@nmh-hub.com.na

Strenger regulasies kom vir uitvoer van renosters

Kommentaar

Stephanus Gerber 11 Maande Gelede 31 December 2024

Meld asseblief aan om kommentaar te lewer

Strenger regulasies kom vir uitvoer van renosters

Kommentaar

Stephanus Gerber 11 Maande Gelede 31 December 2024

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.