Sprinkane is onder beheer, sê ministerie

’n Swerm sprinkane het Dinsdag oor plase net voor Karasburg beweeg.

Melding is ook gemaak van nog ’n swerm wat twee kilometer voor Aus en tussen 50 en 60 kilometer noord van Keetmanshoop opgemerk is. ’n Hardapboer by Mariental het geskryf die voetgangers word al hoe meer.

Op die Facebook-blad “Dagboek van die Boer in Karas en Hardap oor die sprinkaanplaag” waar verskillende boere foto’s kan plaas van die omvang van die plaag in hul omgewing, is oor die swerm by Karasburg gesê: “Die swerm is so groot dit maak ’n skaduwee op die grond.” ’n Vragmotorbestuurder het geplaas: “Daai groot swerm het pas by my verbygevlieg, so 30 kilometer voor Karasburg. Dit lyk soos ’n trein se rook soos jy aankom.”

Arnoldus van Karasburg het gisteroggend gesê: “Ons het die swerm se gatvere gisteraand gepluk. Hulle het op die Plato gaan slaap. Ons spuit nou nog en ek sal later beduie waar hulle gaan slaap. Dankie vir almal se hulp.”

Die swerm van ’n geskatte sewe kilometer is nie net deur die boere bestry nie, die ministerie van landbou, water en grondhervorming het ook drie voertuie en mense gestuur om hand by te sit.

REGERING

Volgens mnr. Chrispin Matongela, adjunkdirekteur vir publieke verhoudings in die ministerie, is die plaag onder beheer.

“Mense moet besef dit neem tyd om die sprinkane uit te roei. Hulle het in die ||Kharasstreek hul eiers gelê wat nou uitbroei. Jy kan niks aan die eiers doen nie. Jy moet wag vir dit om uit te broei. Jy kan net dié bestry wat uitgebroei het. Sommige vlieg ook weg van die teikengebied af.”

Matongela sê hy dink sewe spanne van die ministerie is in die ||Kharas- en Hardapstreek ontplooi wat help met die bespuiting van die sprinkane.

“Ons het 23 mense van ander streke soontoe gestuur om te help. Dis mense wat reeds sprinkane in ander streke bestry het. Hulle het die kennis en dit gaan nie oor die aantal mense wat ons tans in die streek het nie; dit gaan oor hul kennis en vermoë om die werk doeltreffend te doen.”

Die ministerie het verlede jaar met die eerste sprinkaanplaag spanne in al die streke van die land ontplooi om met die monitering en kontrole van sprinkane te help.

“Die plaag is onder beheer in die twee streke, miskien nie tot die bevrediging van die mense op die grond nie, maar die gemeenskap moet nou aan boord kom en help,” het hy gesê.

BOERE

Die eerste vlieërs het drie weke gelede op die plaas Orion buite Mariental aangekom. Volgens me. Elize Cilliers het die boere binne ’n week die sprinkane onder beheer gehad tot Saterdag toe daar in die Aitsumub-omgewing voetgangers opgemerk is.

“My man, seun en klomp boere van ons omgewing is nou by die kommunale plase by Aitsumub sowat 200 km vanaf Mariental besig om die sprinkane te bestry. Daar is miljuisende van hulle. Dit voel soos ’n tweede droogte wat op pad is; hulle vreet alles op.”

Volgens haar is daar nie genoeg water in die gebied beskikbaar nie en is die boere nou besig om water met twee groot vragmotors aan te ry om te spuit.

“Hulle ry water aan sodat die manne daar kan hervul en nie huis toe hoef te ry nie. Dit is te ver en kos te veel. Ek is baie bekommerd ook die langtermyn uitwerking van die gif op die mense. As jy so dag na dag gif spuit en dit inasem, kan dit nie goed wees nie.”

Volgens me. Adelheid von Wielligh wie se man op die Swartrand boer raak die plaag die ganse ||Kharas- en Hardapstreek.

“Ek het in my hele lewe nog nie so iets beleef nie,” het ’n man wat al 63 jaar in die Suide boer gesê.

Volgens haar moet in ag geneem word dat baie van die boere al op aftrede staan; nou moet hulle nog werkers inkry om te help. Talle boere raak siek van die gif wat hulle week na week inasem.

“’n Boer in die Grünau-omgewing sê hy en sy pa het nou al meer as N$75 000 se gif gekoop. Sedert die sprinkane hul verskyning gemaak het, het hulle al 1,2 miljoen liter water gebruik. In die hele omgewing word gesê dat 3 miljoen liter water reeds gebruik is. Water is kosbaar; veral hier in die Suide. Ons kom uit ’n droogte en talle plase moet nog herstel en nou dit. Dis baie geld wat gespuit word en dis nog bo en behalwe die brandstofpryse wat gestyg het. Die boere is nie net moeg nie, hulle is ook finansieel uitgeput.” – [email protected]