Reuse-hupstoot vir bewaringsgebied

Ellanie Smit - ’n Toekenningsooreenkoms is onderteken om jaarliks US$1 miljoen (sowat N$19 miljoen teen die huidige wisselkoers) in finansiering oor ’n tydperk van 50 jaar aan die Skedelkus-Etosha-bewaringsgebied in noordwestelike Namibië te verskaf. Die Skedelkus-Etosha-gebied is ’n bewaringsbrug wat deur verskeie bewaringsgebiede strek, twee nasionale parke verbind en die eerste “People’s Park” omhels – ’n nuwe bewaringskategorie wat die formalisering van gemeenskapsbewaring uitbrei. Volgens die Legacy Landscapes Fund (LLF), beloof die ooreenkoms bogenoemde jaarlikse finansiering vir ten minste vyf dekades aan die streek wat bestaan uit verskeie beskermde en omgewingsbewaringsgebiede. Die ooreenkoms is tussen die World Wildlife Fund (WWF) en Namibië se Geïntegreerde Landelike Ontwikkeling en Natuurbewaring (IRDNC) onderteken. Soos volgens LLF se private-openbare-model is N$190 miljoen (US$10 miljoen) in finansiering afkomstig van die Rob Walton-stigting, ’n private filantropiese skenker, terwyl die res van die LLF-skenking is. Dit sal deur die WWF en die IRDNC met die ondersteuning van die ministerie van die omgewing, bosbou en toerisme geïmplementeer word. Die WWF en IRDNC sal nou met plaaslike vennote, landelike gemeenskappe en omgewingsbewaringsgebiede saamwerk om toesig oor die implementering in die streek te hou. Volgens die LLF sal die langtermyn-finansiering onder meer bydra tot die doeltreffende bestuur van die gebied, plaaslike lewensomstandighede verbeter en kwesbare wildlewespesies beskerm. “Dit verseker jaarliks beduidende en betroubare finansiering vir meer as 50 jaar en met sterk bestuur deur plaaslike regtehouers. Ons is baie dankbaar om hierdie buitengewone Namibiese gebied deel van die LLF-netwerk te maak,” het die uitvoerende direkteur, Stefanie Lang, gesê. – republikein@republikein.com.na

Reuse-hupstoot vir bewaringsgebied

Kommentaar

Republikein 2026-02-03

Meld asseblief aan om kommentaar te lewer

Reuse-hupstoot vir bewaringsgebied

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.