Respekteer die natuur

’n Video van ’n trop woestynaangepaste olifante in die Ugabrivier het onlangs wyd opslae in die sosiale media gemaak. Die video wys hoe ’n voertuig gevaarlik naby aan ’n olifantbul staan, terwyl ’n jong seun probeer om op die voertuig se dak te klim vanuit die bakkie se kappie. Die olifante het ’n sak met koeldrank verwoes. In ’n ander video kan gesien word hoe die jongste kalf in die trop, Fiori, op die leer van ’n wildritvoertuig klim. Dit ondersteun die vermoede dat die olifante te gemaklik rondom voertuie is, wat kan lei tot probleemgedrag in die toekoms.Die organisasie Elephant Human Relations Aid (EHRA) sê kommer is geopper oor die veiligheid van beide mense en olifante in die Kunene- en Erongostreek nadat die video geplaas is.Die besturende direkteur van EHRA, Rachel Harris, het ook haar kommer uitgespreek.“Die onlangse voorvalle in die Ugabrivier beklemtoon die behoefte aan opskerpte bewustheid en verantwoordelike gedrag wanneer mense naby woestynolifante is.“Dit is van kardinale belang dat individue nie die diere nader nie, aangesien dit ֹ’n risiko vir hulle veiligheid inhou en die olifante se natuurlike gedrag beïnvloed,” het sy gesê.“Ons verstaan die fassinasie met olifante. Dit is egter noodsaaklik om te onthou dat die olifante hul omgewing met landelike gemeenskappe deel. Enige gedragsverandering by die olifante wat deur mense veroorsaak word, kan ernstige gevolge op die diere se kans op oorlewing hê“Verskeie olifante is in die verlede van kant gemaak omdat hulle te gemaklik geraak het rondom mense en toegang tot mense se kos gekry het. Ons het almal ’n reuse-verantwoordelikheid wanneer ons tyd in hulle gebied deurbring. Om dit in die toekoms te kan geniet moet ons vandag verantwoordelik optree,” sê Harris.Drie bulle is in 2017 geskiet aangesien hulle té gewoond geraak het aan menskos wat hulle by kampeerplekke en vanuit voertuie gekry het. Hulle gedrag het die lewens van die landelike gemeenskappe en kampeerders bedreig aangesien die bulle tente platgetrap en voertuie beskadig het om toegang tot kos te verkry. Dit het ook daartoe gelei dat die bulle die huise in die omgewing begin vernietig het op soek na kos. Die jonger diere het boonop die probleemgedrag begin aanleer. Fiori is die eerste woestynkalf van die Ugabtrop wat sedert 2014 oorleef het. Meer as 12 kalwers is gebore en het kort daarna gevrek. Dit beklemtoon die kwesbaarheid van die olifante en die verantwoordelikheid wat besoekers het.EHRA het wenke gedeel om die veiligheid van mense en diere te verseker. “Moenie toelaat dat olifante toegang tot enige menskos kry nie en hulle moet nie gevoer word nie. Moenie vrugte of brood saam in die voertuig neem nie. Moenie nader as 20 meter van die olifante af ry nie. Hou ’n ontsnaproete vir jouself en die olifante oop. Moenie agter olifante aanry as hulle wegstap nie en bly in jou voertuig.”WILDE PERDE Drie mense is ook onlangs gewaar waar hulle glo ’n wilde hings langs die pad vryf.Een vrou het na bewering ’n paar meter voor ’n merrie en haar vul gestaan om foto’s te neem. Die Namibian Wild Horses Foundation het hierop gereageer en gesê hulle is verbaas dat niemand nog ernstig beseer is nie.“Dit is malligheid om so naby aan ’n wilde perd te staan. Die diere is wild en onvoorspelbaar. So ’n hings weeg sowat 450 kilogram. Om langs die pad te stop, stel die perde in gevaar. Moenie hulle met kos lok om langs of naby aan die pad te staan nie. Hulle sal dan weer langs die pad gaan staan en’n voertuig of vragmotor kan hulle doodry – soos dit al talle kere in die verlede gebeur het.”Die perde is ook gewoond aan hulle natuurlike kos en enige ander kos kan tot hulle dood lei. – tanja@republikein.com.na

Respekteer die natuur

Kommentaar

Republikein 2025-05-01

Meld asseblief aan om kommentaar te lewer

Respekteer die natuur

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie