'Renosterstropers raak mak'

Renosterstropers raak mak. Hulle slaan nie net meer tydens volmaan toe nie, maar hulle stroop selfs tydens daglig. Só sê ’n moedelose boer in die Okahandja-distrik wat verlede Dinsdag twee mans op sy plaas op heterdaad betrap het met renosterhorings in hul besit. Hy sê die afgelope drie weke het renosterstropers op drie plekke in die sentrale gebied toegeslaan en renosters gestroop en gekwes. Buiten sy witrenoster(s) wat gestroop is, is volgens hom einde Oktober in die Kalkfeld-omgewing een witrenoster gestroop en twee renosters gekwes, asook twee witrenosters wat die afgelope naweek in die Windhoek-omgewing gestroop is. Op die Okahandja-boer se plaas is een van die verdagtes volgens hom berug daarvoor dat hy in die Etosha Nasionale Park amok gesaai het. “Een van die verdagtes wat ons nou gevang het, is vrygelaat op borgtog in verband drie renosterstroperysake,” het die boer gesê. Op die plaas word nog na die renosterkarkas(se) gesoek, maar tydens die arrestasie is die verdagtes met die vars horings en verskeie toerusting vir stropery gevind. “My seun het die selfone van die stropers gekonfiskeer waarop belangrike boodskappe was van die bestuurder van die voertuig wat hulle sou oplaai,” sê die boer.Die renosterkarkas waarna gesoek word, is vermoedelik die van ’n witrenosterkoei. Sy seun vlieg elke dag met die girokopter oor die plaas en honde word ook ingespan.Een stel horings is by die verdagtes gekonfiskeer, waarvan die langste horing volgens die boer 15 cm lank is. “Ons het verlede jaar ons renosters onthoring en ons vermoed dit is die horing van ’n witrenosterkoei.” Geen lof word aan die Namibiese owerhede toegeswaai nie met die boer wat beweer dat daar ’n gebrek aan dringendheid oor die saak is. “Ons het die verdagtes gevang. Die inspekteur van die Blue Rhino-taakspan antwoord nie eens sy selfoon nie. Ons het die taakspan om 17:00 gebel en hulle daag eers 20:00 op die plaas op.”Volgens adjunkkommissaris Barry de Klerk, die hoof van die Blue Rhino-taakspan, is die voorval aan hom om 17:44 gerapporteer en hy het ’n span van Windhoek gestuur wat tussen 19:00 en 20:00 op die plaas aangekom het. Die boer sê intussen is die voertuigbestuurder van die stropers vermoedelik gewaarsku en het snuf in die neus gekry.Die beskuldigdes se saak is tot 5 Februarie 2025 uitgestel en hulle bly in aanhouding. “Renostereienaars hou met belangsteling dop hoe hierdie saak deur relevante owerhede hanteer gaan word,” sê die boer. Hy meen daar is geen dringendheid of samewerking van die regering nie – nie van die Namibiese polisie, die omgewingsministerie tot in die howe om renosterstropery te voorkom of te takel nie.“Ons het ’n saak van 2017 waar ons die verdagtes gevang het en die geweer is positief geïdentifseer met die renosters wat geskiet is. In daardie stadium was meer as ’n dosyn swart- en renosters by ons geskiet.” Hy sê hierdie verdagtes is steeds vry op borgtog.“Ons trek nou by twee dosyn renosters wat geskiet en gekwes is.”‘ONS IS KLAAR’Die boer sê hy gooi handdoek in met renosterboerdery en sy deelname aan die renosterbewaringsprojek (custodianship).“Ons het vanaf 2000 talle swartrenosters geproduseer. Ons het geen voordeel daaruit gekry nie, maar dit was my bydrae tot renosterbewaring.” Hy sê buiten die groeiende aantal stroperysindikate wat al hoe meer professioneel en slinkser word, knel die droogte die boere. Boonop moet renosters onthoring word wat ’n reuse-uitgawe is saam met teenstropingseenhede. “Of renosters onthoring word of nie, hulle word gestroop – nie net tydens volmaan nie, maar helder oordag.“Indien dit so sou voortduur, is ons klaar. Ons trek ’n streep. Die staat kan dan hul renosters kom haal. As dit so aangaan, gaan ons renosters net in die dieretuin sien,” het die boer afgesluit. – francoise@nmh.com.na

'Renosterstropers raak mak'

Kommentaar

Republikein 2025-12-19

Meld asseblief aan om kommentaar te lewer

'Renosterstropers raak mak'

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.