Regering soek groter hap uit houtskool

Die minister van die omgewing, bosbou en toerisme, Indileni Daniel, het ’n beroep op Namibië gedoen om op te hou om rou biomassaprodukte uit te voer waar plaaslike verwerking moontlik is. Volgens Daniel stuur die land op dié manier werks- en ekonomiese geleenthede na die buiteland, in plaas daarvan om dit plaaslik te skep.Sy het verlede week tydens die Standard Bank Biomassa-handelskou op Otjiwarongo gesê die land se natuurlike hulpbronne moet “gedeelde, gebalanseerde welvaart” deur werkskepping, jeugbemagtiging en waardetoevoeging lewer.“Ons moenie rou materiaal uitvoer en die gepaardgaande werksgeleenthede daarmee saam uitvoer nie. Ons produkte moet toenemend ons grense verwerk, verpak, gesertifiseer en met ’n Namibiese handelsmerk verlaat,” het die minister gesê.Daniel het gesê die regering ondersteun uitvoere, maar Namibië moet verder in die biomassawaardeketting beweeg sodat inkomste, vaardighede, belasting en werksgeleenthede in die land bly.Sy het die ministerie se direktoraat bosbou opdrag gegee om dadelik met ’n nasionale voorraadopname te begin, namate die nasionale strategie vir die volhoubare bestuur van bosbronne (2022-’27) sy laaste jaar betree.Die oorsig sal die toestand en volhoubare gebruik van bosbronne, hektare wat uitgedun en herstel is, nasorgpraktyke, permitte en nakoming, produksie- en uitvoervloei, ondernemings en werksgeleenthede wat geskep is, jeug- en vrouedeelname, asook struikelblokke wat belegging beperk, evalueer.“Die resultate moet ’n geloofwaardige basislyn vir enige uitgebreide reaksiestrategie ná 2027 bied,” het Daniel gesê.Volgens Daniel sal haar ministerie met die ministeries wat verantwoordelik is vir nywerheidsontwikkeling, landbou, arbeidsverhoudinge en finansies, sowel as die Namibiese Inkomste-agentskap (NamRA) en die Namibiese Standaarde-instelling (NSI) saamwerk om beleide te hersien. Dié beleide is daarop gemik om die uitvoer van onverpakte en ongemerkte biomassaprodukte geleidelik te verminder waar plaaslike verwerking haalbaar is.Namibië het na raming 45 miljoen hektaar wat deur bosindringing geraak word. Dit sluit ongeveer 10,5 miljoen hektaar in die Otjozondjupastreek in, volgens Daniel.Terwyl bosindringing weidingskapasiteit, grondwateraanvulling, biodiversiteit en landelike inkomste verminder, het sy gesê dit bied ook geleenthede om gedegradeerde grond te herstel. Nywerhede word ook ontwikkel wat houtskool, klein- tot mediumgrootte stukkies hout (wood chips), dierevoer, biochar en hernubare energieprodukte produseer.Daniel het die sektor se groeipotensiaal aan Namibië se werkloosheidsuitdaging verbind en daarop gewys dat slegs 29,1% van die bevolking van werkende ouderdom in diens is, terwyl die nasionale werkloosheid op 36,9% en jeugwerkloosheid op 44,4% staan.Volgens die minister is landbou, bosbou en visserye tans verantwoordelik vir 88 277 werksgeleenthede. Daniel sê elke belegging in natuurlike hulpbronne moet uiteindelik beoordeel word aan die hand van die ordentlike en volhoubare werksgeleenthede wat dit skep.Die minister het ook verwys na die beplande 40MW Otjikoto-biomassakragaanleg buite Tsumeb en gesê dat dit na verwagting jaarliks sowat 245 000 ton biomassabrandstof sal verbruik sodra dit operasioneel is.Volgens haar kan die projek ’n betroubare plaaslike mark vir boere, klein besighede, gemeenskappe en verskaffers van biomassabrandstof skep, terwyl dit Namibië se elektrisiteitsopwekking versterk.’n Lid van die Namibiese Akkerbouraad (NAB) Salomo Mbai het tydens dieselfde geleentheid gesê die land se uitdaging met bosindringing – wat tussen 30 miljoen en 45 miljoen hektaar raak – het ook ’n uitvoerbedryf geskep wat op houtskool- en biomassaprodukte gefokus is.Volgens Mbai ondersteun die houtskoolsektor ongeveer 14 500 werksgeleenthede en genereer jaarliks sowat N$1,5 miljard uit die uitvoer van houtskool en brandhout. Suid-Afrika, die Europese Unie (EU), die Midde-Ooste en die Verenigde State van Amerika (VSA) is onder Namibië se belangrikste markte. – phillipus@nmh-hub.com.na

Regering soek groter hap uit houtskool

Kommentaar

Republikein 2026-08-10

Meld asseblief aan om kommentaar te lewer

Regering soek groter hap uit houtskool

Kommentaar

Republikein 2026-08-10

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.