ReconAfrica wil nóg vyf gate boor

Die Regshulpsentrum (LAC) maak ten sterkste beswaar teen ReconAfrica se plan om nog vyf boorgate as deel van sy soektog na olie in die Kavango te sink.‘n Lywige klagskrif hieroor is Vrydag skriftelik by die kantore van Risk Based Solutions en die omgewingskommissaris afgelewer.Volgens die LAC is dit onwettig vir ReconAfrica om ‘n wysiging en hernuwing van die maatskappy se bestaande omgewingsklaringsertifikaat te versoek om die bykomende werk te doen.ReconAfrica het kennis gegee dat hy nog vier toetsgate wil boor en ‘n tweede sy-boorgat by sy eerste boorstasie op Kawe wil sink.Bykomende eksplorasie sal volgens die LAC egter verg dat alle aansoekprosesse van nuuts moet begin.Die waghond sê hy verteenwoordig belangegroepe wat aansienlik deur die planne geraak sal word. Die LAC maak ook kapsie daarteen dat net partye wat in Junie 2019 gelys is, nou inspraak mag lewer. Bykomende eksplorasie vereis volgens me. Corrina van Wyk van die LAC se Grond-, omgewings- en ontwikkelingsprojek (LEAD) dat die publiek en alle ander partye opnuut betrek moet word.Drie weke was volgens die LAC ook heeltemal te min tyd vir reaksie op die nuwe kennisgewing namens ReconAfrica. Die sperdatum vir insette was Vrydag.Beweerde ongeoorloofde en onwettige optrede wat reeds plaasgevind het, sal volgens die LAC ook deur die omgewingskommissaris oorweeg moet word voordat enige nuwe vergunnings toegestaan word.Die aanlê van toegangspaaie na nuwe boorgate en ander nuwe infrastruktuur en prospekteringsbedrywighede sal volgens die LAC ‘n invloed op die omgewing, gemeenskappe, gemeenskapswoude en bewaringsgebiede hê.‘n Stawende verslag hieroor deur me. Susie Brownlie is by die besware aangeheg.Die omgewingsdeskundige met byna 40 jaar se ondervinding sê die impak van eksplorasie wat reeds gedoen is, is nie eens behoorlik in ag geneem nie.Sy waarsku onder meer teen lugbesoedeling, besoedeling van waterbronne en watertafels en die verbrokkeling van wildlewe se habitat, wat mens-dier-konflik kan laat toeneem. Die gesondheid, leefwyse en inkomste van inwoners kan volgens Brownlie negatief geraak word.Haar verslag lys nog ‘n rits nadele, wat terugslae vir toerisme in die gebied self en die oorgrenspark hier insluit.Die omgewingsimpakstudies wat voorheen gedoen is, bevat volgens Brownlie noemenswaardige tekortkominge.Die LAC sê ReconAfrica se optrede dusver voorsien eerder gronde om hul klaringsertifikaat te kanselleer of op te skort as om die groen lig vir bykomende eksplorasie te gee.

ReconAfrica wil nóg vyf gate boor

Kommentaar

Republikein 2026-05-05

Meld asseblief aan om kommentaar te lewer

ReconAfrica wil nóg vyf gate boor

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.