Ontmoet die Kalkrand-graweskerpioen

’n Onlangse onverwagse waarneming kan bydra tot bewaringspogings en die wetenskaplike begrip verbeter van ’n skerpioenspesie waaroor min bekend is. So sê die Suid-Afrikaanse aragnoloog, dr. Ian Engelbrecht, wat onlangs saam met die plaaslike toergids en burgerwetenskaplike, Murray Lewis, die Harpe-graweskerpioen (burrowing scorpion) in die Kalkrand-omgewing opgemerk het. Engelbrecht en Lewis het die skerpioen wat voortaan as die Kalkrand-graweskerpioen sal bekend staan, opgemerk terwyl hulle aan ’n veldgids oor Namibiese skerpioene gewerk het. “Ons het letterlik met die pad langs gery en probeer vasstel in watter soort habitatte hulle presies leef. Ons het eers een plek gevind, sowat twee of drie kilometer van die oorspronklike plek af. Later het ons op ’n ander pad gery,” het Engelbrecht van die Universiteit van Pretoria in ’n onderhoud met Republikein gesê. “Murray en ek het gesels, en hy sê toe net: ‘Oukei, ons moet hier stop.’ Ons het gestop, uit die motor geklim en siedaar – daar was die gate. Ons moes een van die gate oopgrawe om te sien watter spesie dit werklik is en om dit te bevestig. Ons was baie bly daaroor.” Lewis het ’n liefde vir skerpioene ontwikkel ná ’n waarneming by Wlotzkasbaken en het al dikwels saam met sy vrou, Bianca, ekspedisies onderneem om na skerpioene te soek. Volgens hom het hy tydens die rit saam met Engelbrecht “toevallig” na ’n spesifieke stuk grond gekyk wat baie gelyk het soos die plek waar hulle ander gate gevind het.“Dit het gelyk na ’n goeie plek om te stop. Ongelukkig werk dit waarskynlik nege uit die tien keer nie, maar nou en dan tref jy dit raak en werk dit wel uit. Dit was waarskynlik meer ’n gelukkige raaiskoot as enigiets anders,” het Lewis gesê. Volgens Engelbrecht is daar nie baie mense wat skerpioene bestudeer nie. Gevolglik kry ’n mens gevalle waar spesies slegs bekend is van die een klein plekkie waar dit oorspronklik versamel is. Die vraag volgens hom is egter wat is hul werklike verspreiding.“Ons moet probeer om ’n beeld te vorm van die totale verspreiding as ons die spesie, sowel as sy bewaringsbehoeftes beter wil verstaan.” Die onlangse waarneming van die Kalkrand- graweskerpioen dui volgens Engelbrecht aan die spesie is wyer versprei as wat aanvanklik gedink is. “Dit kom nie net op daardie een klein plekkie voor nie, wat goeie nuus vir die spesie is. Dit beteken die risiko vir negatiewe impakte – byvoorbeeld sou iemand ’n steengroef vestig of as daar ander bedreigings sou ontstaan – is kleiner. Nou weet ons dat dit ook op ander plekke voorkom,” sê Engelbrecht.Die bevinding dui ook daarop dat die bevolkingsgetalle en habitat van die Kalkrand-graweskerpioen in ’n sterker posisie is as wat verwag is. “Dit dui ook aan die spesie is waarskynlik selfs wyer versprei as wat ons gedink het – alhoewel ons steeds nie van ’n wydverspreide spesie kan praat nie. Dit beslaan waarskynlik ’n gebied van sowat 40 kilometer; hoewel dit steeds ’n redelik beperkte verspreidingsgebied vir enige spesie is,” het Engelbrecht verduidelik.EKOLOGIESE BELANGRIKHEIDVolgens hom vorm skerpioene ’n belangrike skakel in die voedselketting en kom redelik algemeen in die gebied voor. Dit tree op as roofdiere en voed op allerhande ander klein insekte en soortgelyke organismes. Die skerpioene speel dus ’n belangrike rol in die ekosisteem deur voedingstowwe oor te dra na ander roofdiere hoër op in die voedselketting. “Hulle skakel insekbiomassa om na skerpioenbiomassa, wat dan weer geëet word deur diere soos uile, vlermuise, muishonde, ratels en akkedisse,” het Engelbrecht verduidelik. Die Kalkrand-graweskerpioen speel ook ’n belangrike rol in die gesondheid van die grond omdat dit “soos alle diere wat in die grond grawe, bydra tot die omgrawe en belugting van die grond”. – irene-mari@nmh-hub.com.na

Ontmoet die Kalkrand-graweskerpioen

Kommentaar

Republikein 2026-11-03

Meld asseblief aan om kommentaar te lewer

Ontmoet die Kalkrand-graweskerpioen

Kommentaar

Republikein 2026-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.