N$1,1 miljard versterk gemeenskapsbewaring

Namibië het ’n reusestap geneem om die toekoms van sy internasionaal bekroonde program vir gemeenskapsbewaring te verseker nadat die Namibia For Life Project Finance for Permanence (PFP)-inisiatief van meer as N$1,1 miljard verlede week amptelik van stapel gestuur is. Die kern van die inisiatief is langtermyn-finansiering wat deur ’n skenkingsfonds gedra word en wat stabiele en voorspelbare ondersteuning sal bied, eerder as korttermyn-skenkerfondssiklusse. Deur die inisiatief beoog die regering, kommunale bewaringsgebiede en internasionale vennote om die langtermyn-beskerming van meer as 20 miljoen hektaar grond te verseker – wat meer as 20% van die land dek. ’n Toegewyde sosioëkonomiese ontwikkelingsfonds sal ook ingestel word om gemeenskapsprioriteite te ondersteun, insluitend werkskepping, vaardigheidsontwikkeling, plaaslike ondernemings en kleinskaalse infrastruktuurprojekte wat daarop gemik is om die lewensbestaan in bewaringsgebiede te verbeter. By die ondertekeningseremonie van die ooreenkoms het eerste minister Elijah Ngurare die ooreenkoms as ’n geskiedkundige mylpaal vir Namibië se Community-Based Natural Resource Management (CBNRM)-program beskryf, wat internasionaal erken word omdat dit bewaring met landelike ontwikkeling en gemeenskapsbemagtiging verbind. Ngurare het gesê die program weerspieël Namibië se grondwetlike verbintenis tot omgewingsbeskerming en volhoubare ontwikkeling, terwyl dit verseker dat landelike gemeenskappe direk voordeel uit die land se natuurlike hulpbronne trek. Hy het gesê die ooreenkomste wat onder die inisiatief onderteken is, vestig langtermyn-finansieringsmeganismes vir bewaringsprojekte en lê duidelike teikens en verpligtinge vir alle belanghebbendes vas. “Die program versterk langtermyn-bewaringspogings deur plaaslike rolspelers te bemagtig, politieke steun te konsolideer en hulpbronne na gedeelde doelwitte te koördineer,” het Ngurare gesê. Namibië se CBNRM-program is gedurende die 1980’s ingestel in reaksie op toenemende wildstropery in kommunale gebiede en het sedertdien ontwikkel tot een van die land se suksesvolste bewaring- en landelike ontwikkelingsmodelle. Volgens Ngurare het die program landelike gemeenskappe in staat gestel om wild, woude en toerismehulpbronne verantwoordelik te bestuur, terwyl dit ekonomiese geleenthede skep deur toerismekonsessies, bewaringsjag en ondernemings wat op natuurlike hulpbronne gebaseer is.WILDBEVOLKINGS Hy het gesê gemeenskapsbemagtiging bly kern tot Namibië se bewaringstrategie en bygevoeg dat die program gehelp het om wildbevolkings te herstel, insluitend olifante, swartrenosters en jagluiperds in kommunale gebiede wat eens swaar deur stropery en die droogte geraak is. Teen 2024 het kommunale bewaringsgebiede ongeveer 186 000 vierkante kilometer beslaan, wat meer as 60% van Namibië se kommunale grond verteenwoordig en sowat 244 000 inwoners ondersteun. Namibië het tans 87 geregistreerde kommunale bewaringsgebiede en 48 gemeenskapswoude, wat gesamentlik aan meer as 2 500 mense werk verskaf, insluitend meer as 700 wild- en boswagters wat by wildmonitering en -beskerming betrokke is. In 2025 alleen het die CBNRM-program na raming N$109 miljoen tot die nasionale ekonomie bygedra. Ngurare het egter gewaarsku dat uitdagings bly voortbestaan, veral rondom bestuur, aanspreeklikheid en mens-dier-konflik. Hy het gesê die nuwe PFP-inisiatief moet help om finansiële bestuur binne bewaringsgebiede te versterk, terwyl dit verseker dat gemeenskappe billike en betekenisvolle voordele uit bewaringsbedrywighede ontvang.BEWARINGSJAG Die eerste minister het ook Namibië se bewaringsjagmodel verdedig te midde van toenemende druk van internasionale anti-jagdrukgroepe. “Namibië sal standvastig bly om wetenskapgebaseerde benaderings van bewaring te bevorder.” Hy het verder die behoefte aan vernuwende en praktiese oplossings vir mens-dier-konflik aangemoedig en beklemtoon dat aanbevelings van onlangse nasionale konferensies nou ten volle geïmplementeer moet word. Ngurare het gesê Namibië moet voortgaan om ’n balans te vind tussen nywerheidsontwikkeling, omgewingsbewaring en gemeenskapsbemagtiging.VENNOTEDie inisiatief is moontlik gemaak deur samewerking tussen die ministerie van die omgewing, bosbou en toerisme (MEFT) , die Community Conservation Fund of Namibia (CCFN), Namibian Association of Community Based Natural Resource Management Support Organisations (Nacso), die Wêreld-Natuurfonds (WWF) en ander vennote. Hulle sluit in die Bezos Earth Fund, Carmen Busquets, die Ontwikkelingsbank van Namibië (DBN), Enduring Earth, Global Environment Facility (GEF), Impact Tank Analysis Foundation, die Liz Claiborne &amp; Art Ortenberg Foundation, Margaret A. Cargill Philanthropies, National Communal Conservancy and Community Forest Alliance (NCCFA), die ProNamib Trust, Laurie en Jeffrey Ubben en ZOMA LAB. Jare lange ondersteuning vir CCFN en die bewaringsgebiede kom ook van die Duitse ministerie van ekonomiese samewerking en ontwikkeling (BMZ) deur die KfW .– ellanie@nmh-hub.com.na

N$1,1 miljard versterk gemeenskapsbewaring

Kommentaar

Republikein 2026-09-16

Meld asseblief aan om kommentaar te lewer

N$1,1 miljard versterk gemeenskapsbewaring

Kommentaar

Republikein 2026-09-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.