Ministerie swyg oor lot van bobbejaantjie

Herhaaldelike navrae aan die ministerie van die omgewing, bosbou en toerisme oor wat met ’n baba-bobbejaan gebeur het wat die afgelope Woensdag op Grootfontein gekonfiskeer is, het sedert Donderdag onbeantwoord gebly. Dit volg nadat Chanté Nell, wat voorheen vir ’n wildreservaat gewerk het en ook gereeld saam met bewaringspersoonlikhede in die omgewing werk, permitte vir die bobbejaan op die dorp wou uitneem om haar na ’n erkende wildreservaat te neem. Die amptenare het egter besluit om die baba-bobbejaan, wat na raming sowat vier weke oud was en nog nie kon loop nie, te konfiskeer. Hulle wou glo nie haar melk hê nie en het haar in ’n hok gesit en toe op ’n voertuig gelaai en weggeneem. Nell sê sy het sowat ’n week vantevore ’n baba-bobbejaantjie ontvang nadat ’n boer in die omgewing die ma doodgeskiet het. “Op Grootfontein is ek maar die persoon na wie mense sulke diere bring. Ek wou haar na ’n wildreservaat stuur, maar is in kennis gestel dat jy nou – anders as die vorige kere toe ek dit gedoen het – ’n permit by die ministerie van die omgewing, bosbou en toerisme moet uitneem. Dit kan nie meer deur die reservaat self ná die ontvangs van die dier gedoen word nie. “Ek is na die ministerie se streekkantoor op Grootfontein verwys. Toe ek daar kom, het hulle haar van my weggeneem. Hulle het gesê ek moes voor die tyd aansoek gedoen het as ek geweet het ek gaan die bobbejaan kry en dat hulle haar nou gaan konfiskeer.”Sy sê hulle was ook ontevrede omdat sy vir die bobbejaantjie ’n doek aangesit het en gesê sy meng met die gang van die natuur in. “Ek het gesê daar is reeds ingemeng toe die ma geskiet is. Die baba is die gevolg van menslike inmenging!“So iets het nog nooit vantevore met my gebeur nie,” sê Nell oor die bobbejaantjie wat sy Alexa gedoop het.PUBLIEKE BELANG“Ek het gevra wat hulle met haar gaan doen en waarheen hulle haar gaan neem, maar hulle het geweier om my te antwoord. Ek wou haar melk in die kar gaan haal het, want sy moes amper weer melk kry. “Hulle sê toe vir my nee, hulle soek nie haar melk nie en ek hoef nie bekommerd te wees nie, alles sal oukei wees,” het Nell aan Republikein gesê.Sy sê die bobejaantjie is daarna in ’n stukkende boks gedruk en agter op ’n bakkie weggeneem, terwyl die amptenare steeds haar vrae geïgnoreer het.“Dit pla my dat hulle nie die melk wou vat nie en ook nie gereageer het op my vrae oor of hulle melk vir haar het nie. Ek kry net die idee dat hulle haar langs die pad gaan uitgooi of haar gaan uitsit. “Is dit nie in die publiek se belang om te weet wat hulle met die diere doen nie?” het Nell gevra. MINISTERIE REAGEERDie ministerie se woordvoerder, Romeo Muyunda, het ook nie enige vrae beantwoord oor wat die amptenare met die bobbejaan gedoen het nie. “Ons is bewus van die insident. Die ministerie word deur die wet gemagtig om wilde diere te konfiskeer wat na ons mening nie reg hanteer word nie,” het Muyunda gesê. Hy erken die bobbejaan is ingebring om vir ’n permit aansoek te doen. “Ons was egter nie gelukkig met hoe die dier hanteer word nie en daar was ook nie behoorlik verslag gedoen oor hoe daar aan die bobbejaan gekom is nie. “Die persoon het vir ons gesê die kleintjie se ma is doodgemaak, maar sy het nie gesê deur wie nie. “Niks laat ’n persoon toe om ’n baba-bobbejaan in hul sorg te neem of in enige ander een se sorg te plaas nie. So ’n geval moet aan die ministerie, as die verantwoordelike owerheid vir wild, aangemeld word vir ingryping. “Die bobbejaantjie is na ons toe gebring met ’n doek aan. Die amptenaar het geen keuse gehad as om die dier te konfiskeer nie. “Ons raai mense af om wilde diere mak te maak of in te gryp. Gevalle waar ingryping nodig is, moet by die ministerie aangemeld word,” het Muyunda gesê. – elvira@republikein.com.na

Ministerie swyg oor lot van bobbejaantjie

Kommentaar

Paulette Wise 3 Jaar Gelede 05 December 2022

Meld asseblief aan om kommentaar te lewer

Ministerie swyg oor lot van bobbejaantjie

Kommentaar

Paulette Wise 3 Jaar Gelede 05 December 2022

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.