Miljoene om mens-wild-konflik te takel

Ellanie Smit - Die Duitse regering het deur die ontwikkelingsbank KfW 10 miljoen euro tot die Gemeenskapsbewaringsfonds van Namibië bygedra om mens-wild-konflik te takel en die uitwerking van die Covid-19-pandemie in Namibië se kommunale bewaringsgebiede te versag.So het die minister van die omgewing, bosbou en toerisme, Pohamba Shifeta, gesê by die oorhandiging van finansieringsprojekte en toelaes aan begunstigdes onder die Poverty-Oriented Support to Community Conservation in Namibia (POSCCIN)-projek in Kunene-suid.By die geleentheid het begunstigdes toelaes ontvang wat Duitsland – deur sy ontwikkelingsbank – en die Namibiese regering gefinansier het.Shifeta het gesê mens-wild-konflik en die gemeenskap se lewensbestaan is die kern van die gemeenskapsgebaseerde natuurlike hulpbron.BESTUURSPROGRAM Hy het gesê ’n toename in wildgetalle is ’n suksesverhaal vir Namibië, maar lei ook tot toenemende mens-wild-konflikvoorvalle.Hy het gesê as ’n balanseringsmaatreël gaan die ministerie voort om belangrike inisiatiewe te implementeer om te verseker dat gemeenskappe voordeel trek uit die oorvloedige natuurlike hulpbronne in die gebied.Volgens hom is gemeenskaplike tuine en lewensbestaan negatief geraak, wat die gemeenskap se lewensbestaan knou, die winste uit toerisme wegneem en ’n potensiële hindernis geword het om die volle biodiversiteit-gebaseerde ekonomiese potensiaal van wild vir mense te ontsluit.Shifeta het gesê onder die POSCCIN-projek is die gemeenskappe betrek in die proses om maatreëls te identifiseer wat finansiering benodig.Sleutelmaatreëls wat geïmplementeer is, sluit in 39 roofdierbestande krale om vee teen roofdiere te beskerm en 22 boorgate, wat geïdentifiseer is en in verskeie stadiums van opgradering is.Verder is nege halsbandstelsels vir vroeë waarskuwing, insluitend waarskuwingstorings, geïmplementeer, en 20 leeus is met halsbande toegerus. Sewe-en-dertig leeuwagters het opleidingstoerusting ontvang en is finansieel ondersteun deur die uitbreiding van die leeuwagterprogram na bewaringsgebiede.“Die Kunene-leeuwagterprogram was so suksesvol dat gemeenskappe in ander streke, soos Zambezi en die sentrale noordelike streke, gekies is om dit te herhaal.”VOORDEEL VIR ALMAL Hy het gesê die omheining en elektrifisering van 22 km van die suidelike grensheining Hobatere was ’n noemenswaardige prestasie.“Hierdie samewerkende benadering wat gevolg is in die herstel en elektrifisering van hierdie heining tussen ons ministerie en die naburige gemeenskaplike bewaringsgebiede het aansienlike kostebesparings en doeltreffendheid tot gevolg gehad.”Shifeta het gesê die ministerie het hierdie benadering tot die herstel en elektrifisering van die Etosha Nasionale Park se heining aanvaar.“Dit is duidelik dat die maatreëls beide die elemente van wildbewaring en mense se lewensbestaan aanraak, en die balans van prioriteite behou soos dit behoort te wees. Ons is immers as mense ewe deel van die omgewing.”Hy het bygevoeg minstens 50% van die totale jaarlikse inkomste wat deur die bewaringsgebiede, gemeenskapswoude of verenigings gegenereer word, moet toegewys word vir die implementering van gemeenskapsontwikkelingsprojekte. “Alle lede van ’n spesifieke bewaringsgebied of gemeenskapswoud moet by daardie gebied baat, ongeag hul stam- of politieke affiliasie.”– republikein@republikein.com.na

Miljoene om mens-wild-konflik te takel

Kommentaar

Republikein 2026-08-12

Meld asseblief aan om kommentaar te lewer

Miljoene om mens-wild-konflik te takel

Kommentaar

Republikein 2026-08-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.