Miljoene om Etosha se paaie te onderhou

Ellanie Smit – Meer as N$40 miljoen is op die Etosha Nasionale Park se paaie bestee, wat oor die algemeen in ’n goeie toestand is en boonop voortdurend gerehabiliteer of onderhou word.Dit volgens ’n verklaring wat deur die ministerie van die omgewing, bosbou en toerisme uitgereik is om duidelikheid te gee oor wat hulle wanopvattings en wydverspreide persepsies noem dat Etosha se paaie en ander geriewe in wanorde verval hetDie ministerie se woordvoerder, Romeo Muyunda, het gesê dat die ministerie in samewerking met ander belanghebbendes geld in die park se toerisme-paaie belê het.“In totaal is 195 km se paaie gebou en voltooi. Dit sluit in 69 km tussen Sonderkop en Olifantsrus en 126 km tussen Olifantsrus en die Galton-hek, insluitend die dolomiet-ompad na die kus, teen ’n koste van N$35 miljoen."Muyunda sê die ministerie is nog besig om ’n 86 km lange pad vanaf Ozonjuitji M’bari tot by Okaukuejo te voltooi, wat na verwagting N$7,3 miljoen sal kos. Hy sê die ministerie fasiliteer ook die toepassing van ’n padonderhoudingstrategie, wat onlangs deur die kabinet goedgekeur is en op verskeie paaie-afdelings gemik is, wat in totaal sowat 213 km lank is. “Die padbouprojek sluit ֹ’n lae volume geseëlde pad, die boor van ’n noodboorgat, asook waterpomptoerusting in.”Muyunda erken daar is enkele uitsonderings, veral in die park se oostelike dele tussen Okaukuejo, Halali en Namutoni, waar die paaie onderhoudswerk benodig. Hy sê dit is hoofsaaklik weens al sy padskrapers wat vir onderhoudswerk op die paaie gebruik word, wat tans herstel word. Hy het bygevoeg sodra die padskrapers herstel is, sal werk begin om die paaie weer gelyk te maak en op aanvaarbare standaard te bring. Daar sal eers met die slegste stukke begin word. “Ons wil ook alle padgebruikers daaraan herinner – veral diegene wat swaar voertuie bestuur ’ om by die park se spoedgrens te hou. As mense te vinnig ry, verminder dit die lewensduur van die park se paaie.” Hy het bygevoeg dat daar nie ’n dag verby gaan wat daar nie onderhoudswerk iewers in een van die land se nasionale parke gedoen moet word nie. “Ons het agtergekom sommige prominente mense het in die park rondbeweeg en vir negatiewe dinge gesoek. As jy daarna soek, sal jy dit vind.” Hy sê dit is dieselfde individue wat leuens versprei dat daar nie aandag aan brande in Etosha gegee word nie. Volgens hom was daar vir langer as ’n maand geen brande in die park nie en is daar aandag gegee aan alle vorige brande wat in die park voorgekom het. Hy sê die ministerie het ’n breedvoerige brandbestuurstrategie vir die voorkoming en bestryding van brande. “Ons watergate is oor die algemeen in ’n goeie toestand. As dit by ons infrastruktuur of ander geriewe kom, kan daar soms tegniese kwessies wees wat die pomp van water raak, maar ons amptenare tree vinnig op wanneer so ’n probleem aangemeld word.’Die ministerie het toeroperateurs wat binne die park werksaam is daaraan herinner dat hulle net so verantwoordelik is daarvoor om seker te maak die park se infrastruktuur word beskerm deur verantwoordelik op te tree. Muyunda sê hulle het met onsteltenis opgemerk dat sommige toeriste toegelaat word om van die paaie af te beweeg, teen ’n hoë spoed te ry, rommel te strooi en uit hul voertuie te klim. “Al hierdie optredes doen Etosha se beeld en reputasie skade aan,” het hy bygevoeg. – republikein@republikein.com.na

Miljoene om Etosha se paaie te onderhou

Kommentaar

Republikein 2025-08-05

Meld asseblief aan om kommentaar te lewer

Miljoene om Etosha se paaie te onderhou

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie