Kunene ‘wil lofsang uit volle bors sing’

“Dis asof die hele Kaokoland, alles wat leef, plant en dier, ˈn lofsang uit volle bors wil sing vir die uitkoms wat God bewerk het! Die lowergroen maak amper ons oë seer.”Só gesels Kunene vir Christus se ds. Erik van Zyl in sy jongste nuusbrief. Dit kom nadat die Kaokoland, wat vir sowat sewe jaar lank reeds onder ‘n ernstige droogte deurgeloop, eindelik mildelike reën ontvang het. “Die droogte is gebreek,” vertel hy na hy vroeg vandeesmaand weer op ‘n sending in die gebied was. “Die wild en die vee raak vet en daar is weer bokmelk vir die kinders,” sê hy. “Die dorre droë woestynvlaktes van Ondije, Onjuva en die Marienfluss is oornag in ˈn lowergroen lushof omskep.”Die noordweste vanaf Etanga, Okamanga, Okaanga, Ondije, Onjuva tot diep in die Marienfluss het oorvloedige reën ontvang. Kunene vir Christus is ’n sendingsorganisasie van die NG Kerk, onder leiding van Van Zyl, wat jare lank reeds uitreike na dié streek doen en dan ook kos versprei.Hoofman Uasuvisa Tjambiru van Ondije vertel: “Dit het vir amper drie weke onophoudelik gereën, selfs die Ondijerivier het weer geloop!”Van Zyl sê dit reën egter nie kos op jou bord nie en dat daar steeds nood is. “Daar is heelwat bokke, maar die meeste beeste is dood.”Tydens sy mees onlangse sending is sowat vyf beestroppe getel. “In die Marienfluss – aan die onderpunt van Van Zylspas – het hy twee jong vrouens en agt kinders gekry wat vir twee weke net die Ombowa-plant, wat wild groei, geëet het. “Die een se broer het kos op Otjitanda gaan haal, maar is nog nie terug nie.”Hy sê hulle het spontaan hande geklap toe hulle 50 kg mieliemeel van hom ontvang het om in hul tydelike hutte te bêre. Van Zyl het vertel die dam by Ondije het gebreek as gevolg van die sterk water wat uit die berge gevloei het, terwyl die brug oor die Skelmrivier tussen Sesfontein en Warmquelle blykbaar so verspoel het dat die pad deur die rivier onbegaanbaar was.Van Zyl sê Maart is die Kaokoland se eintlike reënmaand en dat daar hoop is op standhoudende en wydverspreide reën oor die Kaokoland.Dit kom nadat hy sowat ‘n maand gelede aan Republikein gesê het dat die jarelange droogte in die gebied dreig om alle hoop te verdryf. “Die skadu van die dood hang oor Kaokoland,” het hy toe gesê.Van Zyl het toe ook gesê die Kunene het “wydverspreide landsreën” nodig en dat daar steeds hoop is, omdat die gebied meestal eers later reën ontvang, wat beteken hulle staan eintlik nog aan die begin van die seisoen. – elvira@republikein.com.na

Kunene ‘wil lofsang uit volle bors sing’

Kommentaar

Republikein 2025-12-18

Meld asseblief aan om kommentaar te lewer

Kunene ‘wil lofsang uit volle bors sing’

Kommentaar

Republikein 2025-12-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.