Khorixas-aardbewing meet 5,2

Die aardbewing wat Dinsdag om 22:36 sowat 24 km noordoos van Khorixas voorgekom het, het 5,2 op die Richterskaal gemeet. Dit het ook vlak – minder as 15 km diep – onder die aardkors ontstaan. Namibië se seismologiese netwerke het nog vier naskokke waargeneem wat tussen 3,7 en 2,2 op die Richterskaal gemeet het. Meer naskokke word verwag.Die ministerie van myne en energie se adjunk- uitvoerende direkteur by die geologiese opname, me. Gloria Simubali, het gister in ‘n mediaverklaring gesê ‘n span geo-wetenskaplikes word na die gebied ontplooi om ‘n opname van die intensiteit van die aardbewing te maak. Dit volg nadat verskeie plaaslike seismiese stasies die aardbewing geregistreer het. Die stasies is in Windhoek en op Kamanjab, Opuwo, Rundu, Katima Mulilo, Karibib, Ariamsvlei, Gobabis en Aus.Aardbewings wat 5,0 en hoër op die Richterskaal meet, is gewoonlik duidelik voelbaar en dikwels sterk genoeg om motors tot koppies en borde te skud en kan selfs vensters breek.Die ministerie sê dit het reeds in November verlede jaar ‘n digte seismiese netwerk opgerig om die voortdurende, kleiner aardbewings rondom Kamanjab, Khorixas, Anker en Erwee vas te vang, wat dikwels nie deur die groter seismiese netwerk geregistreer word nie. Dit volg nadat internasionale seismiese agentskappe soos die Duitse Navorsingsentrum vir Geowetenskap (GFZ) aanvanklik gesê het die aardbewing het sowat 4,6 op die Richterskaal geregistreer. Tot dusver is dit nie bekend of die aardbewing enige skade aangerig het nie, maar talle Namibiërs het die aardbewing beskryf as die “ergste skudding” wat hulle nog in Namibië gevoel het, met sommige wat meen hulle het tot 16 naskokke getel.Namibiërs oraloor het dit gevoel; vanaf Kamanjab en Khorixas, tot op Outjo, Otjiwarongo, Sesfontein, Brandberg, Hentiesbaai en Walvisbaai.‘n Inwoner van Outjo vertel op Facebook hulle het aanvanklik twee erge bewings gevoel en toe nog 16 trillings elke halfuur daarna. “Dit is die meeste wat ons nog gehad het.”Nog ‘n inwoner van Khorixas sê hulle het aanvanklik ‘n hewige skudding gevoel, gevolg deur trillings en ‘n gerommel elke nou en dan. “Ek het reeds ‘n paar aardbewings in my lewe ervaar, maar niks soos hierdie nie. Ons moes dié keer naby aan die episentrum gewees het!”Namibië se noordweste is bekend daarvoor dat dit soms ligte aardbewings ervaar. Volgens Earthquake Track is hierdie een van die “sterker” aardbewings oor die afgelope jare, hoewel dit die vierde aardbewing oor die afgelope vier jaar by Khorixas is wat sterker as 5,0 meet. – elvira@republikein.com.na

Khorixas-aardbewing meet 5,2

Kommentaar

Republikein 2026-08-05

Meld asseblief aan om kommentaar te lewer

Khorixas-aardbewing meet 5,2

Kommentaar

Republikein 2026-08-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.