Grootpote floreer op Zannier

Dit gaan goed met die sogenaamde Swakop- of Krismisolifant wat kusbewoners en vakansiegangers op Oukersdag 2019 met sy besoek uit die binneland verras het. Dr. Rudie van Vuuren van die N/a’an ku sê-stigting het op navraag van Network Media Hub (NMH) bevestig dat dit uitstekend gaan met die rondloperbul wat later op die Zannier-wildreservaat oos van Windhoek gevestig is. Die Krismis-ollie, wat Apollo genoem word, het intussen boonop twee jonger flapoormaats, Ace en Astro, gekry om hom geselskap te hou. Destyds is gevrees dat die bul met "Wanderlust" amok by die kus sou maak, as probleemdier verklaar en van kant gemaak sou word. Hy is deur die destydse ministerie van die omgewing en toerisme met water en voer teruggelok binneland toe. Die grootpoot het vir ‘n wyle in die Omarururivier gebly en is middel Januarie 2020 deur 'n veearts van die ministerie met ‘n satellietnekband toegerus om sy bewegings te monitor. Die bul het sowaar weer ‘n U-draai gemaak en 'n maand later teruggeloop see toe waar hy in die Swakoprivier naby die Rössmund-gholflandgoed opgemerk is.Die omgewingsministerie en N/a’an ku sê het tydens ‘n groot verskuiwingsoperasie in April 2020 die olifant naby die gholflandgoed verdoof en op die Zannier-wildreservaat van 7 500 hektaar veilig vrygelaat. Al die verskuiwingskoste van sowat N$500 000, wat die konstruksie van 'n boma insluit, is deur die Shiloh Wildlewe-toevlugsoord in vennootskap met die N/a’an ku sê-stigting, gedek. Die olifant is deur Shiloh Jolie-Pitt, die Namibies-gebore dogter van die bekende akteurs Angelina Jolie en Brad Pitt, as Apollo gedoop.Intussen het twee jonger olifantbulle, Ace en Astro, vanaf N/a’an ku sê se Timbila-reservaat by Apollo aangesluit vir wie hy nou dissipline leer. Astro het so flink gegroei dat sy nekband onlangs vervang moes word. Hy is vanuit ’n girokopter deur die stigting se veearts dr. Maaike de Scheppers verdoof en suksesvol met ’n groter nekband toegerus.– francoise@nmh.com.na

Grootpote floreer op Zannier

Kommentaar

Republikein 2025-12-19

Meld asseblief aan om kommentaar te lewer

Grootpote floreer op Zannier

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.