Etosha: 388 vee oor 5 jaar rondom park gevang

Die ministerie van die omgewing, bosbou en toerisme beoog om die opknapping en opgradering van die Etosha Nasionale Park se grensheining teen 2030 te voltooi. Die minister, Indileni Daniel, het dié aankondiging verlede Donderdag tydens ’n parlementêre sitting gemaak in reaksie op vrae van die PDM-leier, McHenry Venaani.“Ons doelwit, teen die huidige tempo, is om die opgradering van die parkheining teen 2030 te voltooi,” het Daniel gesê. “Met sterk steun van plaaslike gemeenskappe en boere, sowel as verhoogde finansiering, óf deur die volhoubare gebruik van omgewingshulpbronne wat na die Wildlewe-trustfonds gekanaliseer word óf deur verhoogde begrotingstoekennings aan die ministerie, kan hierdie doelwit selfs vroeër bereik word.”Daniel het verduidelik slegs 185 km van die vervalle heining – wat oor ’n totale lengte van 824 km oor die streke van Oshikoto, Oshana, Omusati, Otjozondjupa en Kunene strek – is opgeknap, met 639 km wat oorbly. Die heining sal dan geëlektrifiseer word. “Ons ministerie het 100 plaaslike gemeenskapsverteenwoordigers, insluitend die Nasionale Jeugdiens, ontplooi om die konstruksie van die heining te versnel,” het die minister verduidelik. Daniel het gesê sy het die Etosha Nasionale Park vroeg in April besoek om die stand van sake en vordering wat gemaak is, vas te stel.Sy het beklemtoon die ministerie werk nou saam met gemeenskappe en boere wat naby die heining rondom die Etosha Nasionale Park woon om voorkomende en beskermende maatreëls te implementeer om mens-dier-konflik te verminder en te takel.Venaani het op sy beurt geëis dat die ministerie nuwe benaderings ontwikkel om die Etosha-heining te voltooi. “Minister, ek dink jy pak ’n baie ingewikkelde probleem op ’n baie eenvoudige manier aan. Jy kan nie net vir die mense wat naby die heining buite die park woon, sê dat hulle nóg vyf jaar moet wag voor die heining opgegradeer is nie,” het hy gesê.“Tot dan kan daar verdere mens-dier-konflik wees met wilde diere wat deur die heining vol gate kom,” het Venaani gesê.GEWAS- EN VEEVERLIESEOor die afgelope vyf jaar – vanaf 2019 tot 2024 – is altesaam 388 vee deur wilde diere in bewaringsgebiede naby die Etosha Nasionale Park gevang. Dié vee het hoofsaaklik uit beeste, perde, donkies en bokke bestaan, het Daniel geantwoord op verdere vrae wat in die Nasionale Vergadering (NV) geopper is rakende die Etosha-grensheining.Sy het bevestig 61 hektaar gewaslanderye is gedurende dieselfde tydperk beskadig.“Dit is belangrik om daarop te let dat baie van die mens-dier-konflikvoorvalle wat rondom die Etosha Nasionale Park ervaar word, roofdiere behels wat vee vang, asook skade aan gewasse en waterinfrastruktuur aanrig.Sy het egter gesê hierdie skade en roofdiere word nie noodwendig net deur diere van die Etosha Nasionale Park veroorsaak nie, aangesien daar ook wilde diere in kommunale gebiede en plase langs die park is.Daniel het gesê die maatreëls om mens-dier-konflik te bestuur, sluit hoofsaaklik die konstruksie van olifantbeskermingsmure rondom waterinfrastruktuur in om gemeenskappe en boere te beskerm; die voorsiening van alternatiewe waterpunte vir wilde diere; die konstruksie van roofdierbestande krale om te voorkom dat vee deur roofdiere gevang word; die verwydering van probleemdiere en die wilde diere met halsbande toe te rus as ’n vroeë waarskuwingstelsel.“Ons het ook bewusmakingsprogramme met gemeenskappe uitgevoer.”Die minister het gemaan sommige gemeenskappe se veeposte en gewaslanderye is te naby aan Etosha.“Ander verbind selfs hul heinings met dié van die Etosha Nasionale Park. Dit kan nie toegelaat word nie, aangesien dit wilde diere lok om uit die park te kom en vee aan te val en in gewaslanderye te wei.”Daniel het gesê die ministerie glo dat hierdie maatreëls aansienlik bygedra het tot die vermindering van mens-dier-konflik rondom die Etosha Nasionale Park. Sy het benadruk meer moet nog gedoen word, insluitend deur die gemeenskappe en boere self.– republikein@republikein.com.na

Etosha: 388 vee oor 5 jaar rondom park gevang

Kommentaar

Republikein 2025-12-16

Meld asseblief aan om kommentaar te lewer

Etosha: 388 vee oor 5 jaar rondom park gevang

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.