Droogtegebiede met wild aangevul

Die ministerie van die omgewing, bosbou en toerisme het einde Junie talle wild uit die Etosha Nasionale Park verskuif om droogtegeteisterde gebiede se bevolkings te laat groei.

Altesaam 256 springbokke en 190 gemsbokke is na die Kunenestreek verskuif, 90 vlaktesebras na die Nyae Nyae-bewaringsgebied, asook 15 gemsbokke en 24 vlaktesebras na die Uukwaluudhi-bewaringsgebied. 

“Die wildverskuiwings is gedoen om sekere spesiebevolkings wat deur langdurige droogtes verminder is, weer te bevolk, om prooi vir roofdiere soos leeus te verskaf en mens-dier-konflik te bekamp, ​​terwyl die algehele biodiversiteit in hierdie gebiede verhoog word,” sê die ministerie.

Daarbenewens beplan die ministerie om in die komende maande nog 150 gemsbokke na die Kunene, asook 20 kameelperde en 200 impalas na Nyae Nyae te verskuif.

“Wat selfs meer verwoestend as die droogte was, was die skiet-en-verkoop-beleid wat terselfdertyd tussen 2012 en 2017 geïmplementeer is. Ek hoop ons maak nie weer dieselfde fout nie,” lui kommentaar op die ministerie se Facebook-blad.

– [email protected]