Dolfyne wemel in kuswaters

Die kuswaters van Walvisbaai het in 2025 weer eens van mariene soogdiere gewemel. Volgens Marine Eco Foundation Namibia is ongeveer 3 720 dolfynwaarnemings gedurende die jaar aangeteken – 'n syfer wat beide die diversiteit van spesies en die doeltreffendheid van voortgesette navorsing en bewaringspogings beklemtoon. Die meeste waarnemings (2 157) was van die seldsame Heaviside-dolfyne (Cephalorhynchus heavisidii). Daarbenewens was daar 1 130 waarnemings van bottelneusdolfyne (Tursiops truncatus) en 433 van vaaldolfyne (Lagenorhynchus obscurus). Die syfers is gebaseer op sistematiese opnames sowel as verslae van navorsers, vrywilligers en lede van die publiek wat hul waarnemings op die water gedeel het. Die organisasie het sy optimisme uitgespreek vir voortgesette navorsing en bewaringsukses in 2026, wat beide dolfyne en walvisse langs Namibië se kuslyn sal bevoordeel. FOTO’S Marine Eco Foundation Namibia