Die woude van ons woestynland

Die ministerie van die omgewing, bosbou en toerisme het met Think Namibia en die Hanns Seidel-stigting (HSF) hande gevat om ‘n dokumentêre reeks getiteld The Forests of a Desert Land bekend te stel.Die reeks kortflims is op 6 April in die hoofstad bekend gestel en is vervaardig en geregisseer deur Tim Huebschle, ‘n Namibiese rolprentregisseur en draaiboekskrywer. Die dokkies is in die noordooste van Namibië verfilm en word vertel deur die oë van “gewone mense” om ons te herinner dat die lewe in ‘n woestynland die skaduwee van &#039;n boom vereis. Die dokumentêre films beklemtoon ook die belangrikheid van die bewaring van die woude en woudekosisteme.Omgewingsminister Pohamba Shifeta het by die première gesê Namibië moet teruggaan na die dae toe klaskamers gevul was met meubels wat deur Namibiërs, van Namibiese materiale, gemaak is. “Ek wil die Hanns Seidel-stigting en alle ander rolspelers loof omdat hulle dit moontlik gemaak het dat hierdie spanpoging op so ‘n verreikende manier gewys word. Wanneer ons ons hulpbronne meer volhoubaar begin benut, sal dit nie net baie geld bespaar nie, maar dié hulpbronne sal ook langer hou,” het hy gesê.Hierdie projek het ten doel om bewustheid oor die waarde van woude te skep en te verhoog, veral vir gemeenskappe wat met en van bos-ekosisteme leef. Die projek is in Oktober en Desember 2021 van stapel gestuur en het op die Kavangostreke gefokus.DIE REGISSEUR VERTELSó vertel Tim Huebschle, die regisseur van die reeks:So min is bekend oor my tuisland, maar as daar een ding is wat dit regkry om die vergetelheid te oortref, is dit die Namibwoestyn. Massiewe sandduine ontmoet die Atlantiese Oseaan vir honderde kilometers. Dis pragtig - en dodelik. Anderkant die woestyn lê ‘n dikwels-droogtegeteisterde land, onvrugbaar, dog soms vrugbaar wanneer die reën kies om te val. In die verre Noorde is daar woude. Dit is magiese plekke vol lewe en geheime. Maar die magie is besig om te verdwyn.Mense kap bome af. Hulle doen dit al vir honderde jare. Hout is en word gebruik om huise en heinings te bou, gereedskap en kunsvlytitems te maak en om te kook. Die bos voorsien. Maar oor die afgelope drie dekades is die woude van noordelike Namibië onvolhoubaar uitgekap. Daar is industriële kapwerk aan die gang – en daar is die voortgesette gebruik van die hout deur die plaaslike bevolking wat dit nodig het vir hul voortbestaan. Geen nuwe bome word geplant nie. Woude word tot op die grond afgebrand om grondgebruik vir landboudoeleindes moontlik te maak.Verwoestyning word aangevuur deur versengende temperature in die lang somer van September tot Maart, terwyl ons net wag en kyk wat volgende gaan gebeur – asof klimaatsverandering by ons landsgrens eindig.Ons drie protagoniste deel hoe hulle met die oorblywende woude omgaan en daarop staatmaak. Van ‘n meisie van ’n klein dorpie wat elke dag vuurmaakhout versamel om te kook, tot ‘n marathonatleet wat beter moet asemhaal en ‘n boer wat elke jaar langer en langer wag vir die reën, is hierdie glimpse in dié plattelandse lewens bedoel om ons almal te inspireer om vir ‘n oomblik stil te staan. En dink dan aan wat ons eintlik doen en behoort te doen om die woude van ‘n woestynland aan die lewe te hou.Die reeks sal op 18 Junie sy internasionale première by die Dances with Films-rolprentfees in Los Angeles hê.Terselfdertyd is die nasionale uitrol aan die gang, insluitend vertonings in afgeleë gebiede van noordelike en noordoostelike Namibië. Die reeks word op 14 Oktober vanjaar op YouTube bekend gestel – wanneer Boomplantdag in Namibië gevier word.Die lokprent kan hier gekyk word op https://www.youtube.com/watch?v=RlLuCIFBozI

Die woude van ons woestynland

Kommentaar

Republikein 2026-05-05

Meld asseblief aan om kommentaar te lewer

Die woude van ons woestynland

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.