Bykans 300 km se visvangnette verbrand

Verlede jaar is 278 kilometer onwettige visvangnette uit die Sikunga-kanaal in die Zambezi deur die Sikunga Fish Guards verwyder en verbrand. Die gekonfiskeerde nette was hoofsaaklik monofilament- en muskietnette. Die Sikunga Fish Guards het ’n nuwe video gemaak waarin hulle oor hulle werksuksesse en ook die aanhoudende uitputting van die visbronne in die Zambezirivier praat. Die Sikunga-kanaal vloei uit die Zambezirivier, maak ’n boog met ’n eiland in die middel en vloei weer terug in dié rivier. Die viswagters is deel van &#039;n gemeenskapsprojek wat onder die Sikunga-bewaringsgebied geregistreer is. In 2017 het die eerste bewaarders as vrywilligers begin werk en die projek is nou ’n gesamentlike aksie van die privaat sektor en dié bewaringsgebied. Mnr. Justice Muhinda van Gondwana Collection wat deel is van die Sikunga-visbeskermingsgebied se bestuur, het verduidelik die rivier is ’n gedeelde hulpbron en dat die Zambezirivier se visbronne uitgeput is.“Die mense kom nou onwettig in die kanaal visvang. Hulle weet dat ons viswagters nie gewapen is nie. Die Zambiërs het pangas en assegaaie en dit gebeur dikwels dat hulle die boot van die viswagters met hulle mukoros omsingel en hulle dreig. Dit is ’n baie moeilike en gevaarlik werk, maar wat kan ons doen? Hulle moet dag en nag die kanaal patrolleer en aanhou om ons vishulpbronne te beskerm anders sal ons niks oor hê nie.”Mnr. Bernhard Sikwana, het in 2011 as ’n vrywillige viswagter begin. “Ons word baie kere deur die Zambiërs aangeval. Daar was ’n geval van twee manne wat ons in hegtenis geneem het en op ons boot gelaai het. Toe ons in die middel van die rivier gekom het, het daar ’n bakleiery ontstaan en die manne het die bestuurder van die boot, van die boot afgegooi. Hulle het toe na die oewer gery en weggehardloop. Ons kon nie sy liggaam vind nie en hy is nou vir altyd weg. Dit het nou al twee keer gebeur en ons het al twee van ons wagters so verloor,” het hy gesê. Al die nette wat deur die wagters afgevat word, word onmiddellik verbrand. “Die mense gebruik muskietnette wat alles vang, selfs die eiers van die visse. Hulle gebruik ook die onwettige monofilamentnette. Die nette is groen en wanneer hulle in die water is kan die visse hulle nie sien nie. Die nette vang ook alles. "Daar word tussen 70 en 90 kilometer onwettige nette per maand gekonfiskeer. Die viswagte vat ook die mukuros weg. Dit verkoop ons aan gemeenskappe buite Sikunga sodat hulle nie weer vir visvang in ons kanaal gebruik kan word nie. Dit beteken egter dat die mense in Zambië talle groot bome afkap om nuwe mukoros te maak.”Die viswagters oorhandig oortreders aan die polisie. Die polisie deporteer die oortreders terug na hulle land en ’n paar dae later word hulle weer deur die viswagtersd gewaar waar hulle met nette in die kanaal visvang. “Hulle is nie bestaansvissermanne nie, hulle is kommersiële vissers. Die visse word in Zambië gedroog en dan na ander Afrikalande soos die DRK (Demokratiese Republiek van die Kongo) en Asië uitgevoer. "Namibiërs vang vir eie verbruik hulle rig geen skade aan die kanaal se visgetalle aan nie. Sikunga is in Namibië en die mense kom onwettig oor in ons waters, met onwettige nette en plunder ons vis. "Maar dit is nie net die vis wat geplunder word nie, hulle stroop ook ons olifante. Om te sien hoe buitelanders ons vis en diere plunder is baie kommerwekkend,” se Sikwana in die video.

Bykans 300 km se visvangnette verbrand

Kommentaar

Republikein 2025-09-12

Meld asseblief aan om kommentaar te lewer

Bykans 300 km se visvangnette verbrand

Kommentaar

Republikein 2025-09-12

Meld asseblief aan om kommentaar te lewer

MELD AAN

Advertensie