Bruin hiënas hou geen bedreiging in

“Ek moes net hulp vir die arme dier kry. Hy is amper doodgery en het so bang gelyk. Hulle is belangrik en ons moet hulle beskerm,” het mnr. Robin von Dutch van Lüderitz gesê nadat hy vroeg Dinsdagoggend op pad werk toe ’n bruin hiëna (strandwolf) teëgekom het. “Ek wou oor die pad loop toe ek die dier sien. Hy het gehardloop en daar was ’n aankomende voertuig. Gelukkig was die bestuurder paraat en hy het spoed verminder anders sou hy die hiëna doodgery het. Dit was baie hartseer om die dier so bang te sien. Die voertuig het hom naelskraap gemis en hy het in ’n verlate gebou in die nywerheidsgebied ingehardloop.” Von Dutch het in Oktober 2021 ook ’n hiëna in dieselfde straat sien hardloop.GEREELDE KUIERGASVolgens me. Marie Lemerle is dit dieselfde hiëna wat op 14 Mei in die dorp opgemerk is. “Ek het foto’s van die dier geneem. Hiënas kan aan die individuele strepe aan hul bene uitgeken word. Die spesifieke dier is reeds in September 2021 deur Simoné en Liska Kock by Shark-eiland in die dorp afgeneem. Jessica Kemper het ook in Augustus 2021 die hiëna ’n paar kilometer buite die dorp opgemerk. Dit blyk ’n jong individu te wees,” het sy gesê. Lemerle is sedert 2017 by die Bruin hiëna-projek en dr. Ingrid Wiesel betrokke. Sy werk tans aan haar PhD terwyl sy die bruin hiëna-bevolking in en om die Bakersbaai-robkolonie bestudeer. “Wanneer mense ’n bruin hiëna in die dorp gewaar, moet hulle eenvoudig hul afstand hou. Los die dier uit om onnodige stres vir die dier te vermy. Hulle is nie verdwaal of verlore nie en sal hul pad weer uit die dorp en terug na die nasionale park vind. Maak net seker jou troeteldiere word beskerm deur jou hekke snags toe te hou en hulle binne te hou. Die wet beskerm die dier en moet in vrede gelos word.”Sy moedig mense aan om snags versigtig te ry en sodoende te vermy dat hulle ’n bruin hiëna raak of doodry. “Voertuie is die grootste bedreiging vir bruin hiënas rondom die kusdorpe. Sommige bruin hiënas wat in die binneland woon, moet oor die pad loop om die kus en die robkolonies te bereik. Ongelukkig is dit nie ongewoon vir hiënas om snags op die teerpad tussen Aus en Lüderitz doodgery te word nie. Die toename in die aantal vragmotors wat dié pad gebruik, help ook nie, aangesien meer verkeer snags op die pad voorkom en dit moeilik is om die diere te vermy.”“Langs die kus vreet dié hiënas meesal klein Kaapse pelsrobbe en hul bevolking is hoog in vergelyking met ander gebiede in die binneland. “Bruin hiënas is oorwegend nagdiere wat lang afstande kan aflê om kos te soek en nuwe gebiede te verken – veral jong mannetjies wat van die trop wegbeweeg het. “Ons het byvoorbeeld in Maart 2021 ’n mannetjie met ’n GPS-halsband toegerus en ons het opgemerk hy het gereeld tussen Lüderitz en die Oranjerivier, wat 250 km ver weg is, beweeg. “Bruin hiënas is ook nuuskierige diere en besoek kusdorpe soos Lüderitz, Oranjemund en Swakopmund. Ons wil almal daaraan herinner dat bruin hiënas nie ’n bedreiging vir mense inhou nie. Hulle is nuuskierige diere, maar ook redelik bedees en loop gereeld in ons dorp rond.” – tanja@republikein.com.na

Bruin hiënas hou geen bedreiging in

Kommentaar

Republikein 2025-08-04

Meld asseblief aan om kommentaar te lewer

Bruin hiënas hou geen bedreiging in

Kommentaar

Republikein 2025-08-04

Meld asseblief aan om kommentaar te lewer

MELD AAN

Advertensie