1 600 aansoeke om omgewingsklaring ontvang

Ellanie Smit – Altesaam 1 600 aansoeke om omgewingsklaringsertifikate (ECC) is in 2022 ontvang waarvan 75% goedgekeur is. Volgens die minister van die omgewing, bosbou en toerisme, Pohamba Shifeta, was die meeste van die aansoeke vir gevaarlike stowwe, infrastruktuurontwikkeling, grondhersonering en mynbou.Hy sê die ministerie het ook verlede jaar 80 terreine besoek met die oog op die nakoming en monitering van omgewingsregulasies.Shifeta het verder gesê onwettige sandontginning bly ’n uitdaging en die ministerie werk saam met tradisionele owerhede en die polisie om toenemende sandmynbedrywighede meer volhoubaar te reguleer.Hy het bygevoeg die ministerie het ook konsepregulasies spesifiek vir sandontginning ingevolge die wet op omgewingsbestuur (EMA) ontwikkel om die koördinering en regulering daarvan op te skerp.Met betrekking tot die bestuur van vaste afval, werk die ministerie saam met verskeie belanghebbendes in terme van die standaarde vir afvalverwydering en -riglyne.“Ons is tans in gesprek met die Namibiese Instituut vir Standaarde (NSI) om die Suid-Afrikaanse minimum vereistes vir afvalstorting by stortingsterreine te implementeer.”Die ministerie het ook ’n voorstel aan die kabinet voorgelê om plastieksakke vanjaar te verbied as ’n maatreël om rommel en omgewingsagteruitgang te verminder.Volgens Shifeta werk die ministerie reeds sedert 2017 aan die hersiening van die wet.WYSIGING VAN DIE WET“Die wysigingswetsontwerp op omgewingsbestuur is afgehandel ná ’n deeglike konsultasieproses wat in Oktober 2020 plaasgevind het.”Die wysiging sluit onder andere die verklaring van omgewingstandaarde, verskerpte maatreëls om besoedeling te voorkom, prosedures met betrekking tot die toepassing van strategiese omgewingsevaluerings en verskerpte bepalings met betrekking tot afvalbestuur in.“Die wysigingswetsontwerp maak ook voorsiening om te verseker dat omgewingsassesserings-praktisyns geregistreer is en aan ’n sekere standaard voldoen,” het Shifeta gesê.Hy het verder gesê die ministerie beoog om deur die wysigingswetsontwerp die geldigheid van ECC’s van drie tot vyf jaar te verleng.“Die ministerie is in die proses om die wysigingswetsontwerp aan die parlementêre komitee oor wetgewing voor te lê. Dit is ons hoop dat die wetsontwerp ook vanjaar aan die parlement vir goedkeuring ter tafel gelê sal word.”Shifeta het bygevoeg dat die wetgewing oor Toegang en Fonds-verdeling (ABS) ook nou in werking getree het en dit sal glo hul pogings versterk om meer navorsing en produkontwikkeling uit ons inheemse plante en ander genetiese hulpbronne te verseker en ons plaaslike gemeenskappe te bevoordeel. Die ABS-kantoor is reeds gestig en operasioneel. – republikein@republikein.com.na

1 600 aansoeke om omgewingsklaring ontvang

Kommentaar

Republikein 2025-11-04

Meld asseblief aan om kommentaar te lewer

1 600 aansoeke om omgewingsklaring ontvang

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.