'Zuma wil na Dubai ontsnap'

Korrespondensie tussen lede van die omstrede Gupta-familie en hul werknemers suggereer dat pres. Jacob Zuma dit oorweeg om die Verenigde Arabiese Emirate (VAE) sy familie se “tweede tuiste” te maak.Die korrespondensie, wat deel vorm van 'n groot versameling korrespondensie in besit van Netwerk24 se koerant, City Press, toon ook hoe die familie ministers en senior bestuurders van staatsbeheerde korporasies met geskenke oorlaai en tot watter mate hulle die staat in hul sakke het.Die ongelooflikste inligting vervat in die e-posse is 'n konsepbrief van Zuma aan die kroonprins van die VAE. Dit vorm deel van 'n e-pos wat Sahara Computers se uitvoerende hoof, Ashu Chawla, aan Zuma se seun Duduzane gestuur het.Daarin skryf Zuma: “Ek het goeie herinneringe aan ons ontmoeting in die VAE en die wonderlike gasvryheid en warmte teenoor my gedurende ons besoek. Dit is met hierdie sentiment dat ek bly is om u in kennis te stel dat my familie besluit het om die VAE ons tweede tuiste te maak. Dit sal 'n groot eer vir my en my familie wees om u beskerming (“patronage”) te verkry gedurende ons voorgenome verblyf in die VAE.”City Press kon nie vasstel of dié brief ooit aan die kroonprins gestuur is nie.Die koerant is ook in besit van korrespondensie waarin Gupta-werknemers 'n reis vir Matshela Koko, Eskom se uitvoerende hoof, na Dubai beplan het. Die reis, in Januarie verlede jaar, is gereël toe Koko uitvoerende groephoof van kragopwekking was en die Guptas besig was om die Optimum- steenkoolmyn van Glencore te koop met die hoop om steenkool aan Eskom te lewer.REIS- EN VERBLYFKOSTEKoko se reis- en verblyfkoste in die luukse Oberoi-hotel in Dubai is alles deur die Guptas betaal, luidens die korrespondensie. In 'n e-pos van 'n Oberoi-werknemer, Reya Pomar, aan Chawla, bevestig Pomar Koko se bespreking en instruksies om hom op die lughawe te haal en vra wie die rekening gaan betaal.Chawla reageer: “Sahara sal die hele rekening betaal. Moet asseblief nie 'n kredietkaartwaarborg van die gas by aankoms vra nie.”Die hotel bevestig ook dat 'n chauffeur gereed staan om Koko na 'n adres in die eksklusiewe Emirates Hills te neem. Die Guptas besit 'n huis ter waarde van R445 miljoen in dié voorstad. Die Oberoi-hotel is 'n gunstelingblyplek van die Guptas en die president se seun, Duduzane, het ook vroeër dieselfde maand waarin Koko daar was, daar tuisgegaan.Die e-posse in City Press se besit toon dat Dan Mantsha, voorsitter van die raad van Denel, ook die Guptas in Dubai besoek het. Sy reisreëlings is ook deur Chawla gemaak – op dieselfde dag as wat hy Koko se verblyf bespreek het.Kort nadat Mantsha by Denel aangekom het, het hy ontslae geraak van Denel se uitvoerende hoof, Riaz Saloojee, en toe begin werk aan 'n samewerkingsooreenkoms tussen Denel en die Gupta-maatskappy VR Laser.Nog iemand wie se verblyf by die Oberoi deur die Guptas betaal is, is Mosebenzi Zwane, wat in September 2015 as minister van minerale bronne aangestel is. In Desember daardie jaar het die Guptas vir hom 'n kamer in die Oberoi bespreek en ook 'n BMW 7-reeks gehuur om Zwane van die lughawe na hul huis in die Emirates Hills te neem.Zwane is ook die man wat die Guptas saam met hulle na Switserland geneem het om Glencore se grootbaas, Ivan Glasenberg, te oorreed om Optimum aan hulle te verkoop. Uit die e-posse is dit duidelik dat die familie Zwane so te sê as hul private eiendom beskou.Een van die e-posse is van JP Arora, uitvoerende hoof van die Guptas se JIC Mining Services, aan die Gupta-broers se neef, Kamal Singhala, en Ronica Ragavan, uitvoerende hoof van Oakbay. Daarin nooi Arora hulle en hul gades na 'n “private – slegs op uitnodiging” – aandete met Zwane tydens die 2016-mynindaba in Kaapstad.In nog 'n e-pos van Chawla bevestig hy die passasierslys vir 'n reis in Desember 2015 op die Guptas se private Boeing-sakestraler, ZSOAK, na Zürich via Delhi.Die sewe passasiers sluit in Zwane, en drie bemanningslede. Ook op die vlug was Rajesh Gupta, hul sakevennoot Salim Essa en Maleatlana Joel Raphela, adjunkdirekteur-generaal van regulasies in die departement van minerale bronne.ZWANE SE CVDie e-posse bevat ook korrespondensie wat dui op die Guptas se moontlike rol in die aanstelling van Zwane as minister van minerale bronne. Op 31 Julie 2015 – twee maande voor Zwane aangestel is – skryf Oupa Mokoena van Koena Consulting en Property Developers van Zwane se tuisdorp, Vrede, aan Tony Gupta: “Bevestig asseblief die CV van mnr. Mosebenzi Zwane vir u aandag.”In 'n e-pos in Februarie 2016 van Nazeem Howa, voormalige uitvoerende hoof van Oakbay, waarin hy 'n vraag van die media verwag oor Zwane se betrokkenheid by die berugte voorval in 2013 toe 'n Gupta-vliegtuig vol bruilofsgaste op die Waterkloof-lugmagbasis geland het. Howa skryf aan Duduzane Zuma en Tony Gupta: “Ek het hulp nodig met sommige van die antwoorde.“Ek dink ons moet ook voorberei vir 'n vraag (van die media) oor sy (Zwane se) rol rondom die Waterkloof-landing.” – Netwerk24

'Zuma wil na Dubai ontsnap'

Kommentaar

Republikein 2025-05-02

Meld asseblief aan om kommentaar te lewer

'Zuma wil na Dubai ontsnap'

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie