Zim verhang bordjies teen o.18's

Die Namibiese skolespan sal volgende maand in Harare sake moet regstel.
Andrew Poolman
Andrew Poolman - 'n Nederlaag op die laaste dag het die glans van die Namibiese deelname aan die o.18 Akademie­week-rugbytoernooi afgehaal.

Namibië en Zimbabwe het Saterdag soos gebruiklik op die finale dag van die toernooi ontmoet, nadat beide verlede jaar verdere deelname aan die o.18 ­Cravenweek ontsê is.

Zimbabwe se oorwinning met 27-6 is 'n ommeswaai nadat Namibië die afgelope jare die botoon in die nie-amptelike “toets” tussen die nasionale skolespanne gevoer het.

Vanweë beserings aan sleutelspelers op die vorige twee speeldae het dit voetwerk gekos om 'n volledige 23-tal vir die ontmoeting teen Zimbabwe in die veld te stoot.

Afrigter Ainsley Daniels wou nie die beserings as 'n verskoning vir die nederlaag voorhou nie.

“Teen 'n Zimbabwe-span wat fisiek veel groter as ons was, het ons ons man gestaan. In die eerste minute het ons verdediging ons in die steek gelaat en hulle het 'n drie gedruk.

“AJ Zaahl (heelagter) het met 'n strafdoel geslaag en Namibië het verskeie kere belowend aangeval, maar kon nie afrond nie. Ons hanteerwerk was nie goed genoeg nie en 'n paar seker drieë het deur die vingers geglip. Zimbabwe het met meer selfvertroue begin speel en het ons foute uitgebuit om uiteindelik met die telling weg te hardloop (drie verdoelde drieë en twee strafdoele).”

Zimbabwe was een van net drie onoorwonne spanne ná drie wedstryde, benewens die WP en SWD. Namibië het vroeër Valke-platteland en Griekwas geklop.

Volgens Daniels was die agtsteman en kaptein Victor van der Watt, haker JC Rossouw, slot Pieter Daan Kok, flank De Wet Oosthuizen, vleuel Peace Shimwino, heelagter Aljarreau Zaahl en DJ Holtzhausen (skrumskakel ná Danie van der Merwe se besering) van die individuele uitblinkers vir die week. “Die ander spanlede het ook hul kant gebring.”

Die Namibiërs se visier sal nou des te meer ingestel wees om in Augustus beter te vaar wanneer hulle in Harare in 'n vierhoekige toernooi teen Zimbabwe, Kenia en Suid-Afrika gaan speel.

Twee ander afrigters is vir Augustusmaand se toer aangestel, naamlik mnre. Henjan van der Heyde (Walvisbaai) en Johan Zaayman (Windhoek Affies).

'n Kinkel in die kabel is dat die Namibiese span eers op die Maandag ná die halfeindstryde van die Momentum o.19 Superliga op 11 Augustus die reis na die buurland aanpak. Spelers wie se skoolspanne tot die finaal deurdring, sal agterbly vir dié geleentheid, terwyl die toerspan dus eers op die laaste oomblik uit die res van die oefengroep gefinaliseer sal word.

Kommentaar

Republikein 2025-05-13

Geen kommentaar is op hierdie artikel gelaat nie

Meld asseblief aan om kommentaar te lewer