YouTube-skieter dalk ‘gegrief oor rekening’

Nasim Aghdam wat Dinsdagmiddag haarself en drie ander mense by die hoofkantoor van YouTube in die Amerikaanse deelstaat Kalifornië geskiet het, was moontlik gegrief omdat dié maatskappy haar rekening gesluit het.Die vermoede was aanvanklik dat die skietery weens ’n huishoudelike twis was en dat die man wat gewond is Aghdam se kêrel was, maar die moontlikheid word nou ondersoek dat sy dalk gegrief was oor haar YouTube-rekening.The Los Angeles Times berig sosialemediarekeninge van iemand met dieselfde naam as Aghdam het verlede week gekla dat YouTube verhoed dat mense na haar video’s kyk. “Daar is nie gelyke geleenthede op YouTube of ander webtuistes vir video’s nie, jou kanaal sal groei as hulle dit toelaat!” sê sy op ’n webtuiste.Die rekening is deur YouTube gesluit weens oortredings van sy beleid.Niks is nog deur die polisie bevestig nie en alle moontlikhede word ondersoek. Daar is reeds uitgevaar teen die verspreiding van fopnuus oor die voorval.CBS News berig paniekbevange werknemers van YouTube het met middagete uit die gebou gevlug en daar was ’n sterk polisieteenwoordigheid op die toneel.Aghdam is op die toneel dood verklaar terwyl ’n man en twee vroue met skietwonde in die hospitaal opgeneem is. Die man en een van die vroue se toestand is ernstig. Een persoon is beseer toe mense uit die gebou gevlug het.Ed Barberini, hoof van die polisie in San Bruno, het aan CNN gesê die polisie het in die stadium nog baie min inligting.Zach Vorhies (37), ’n senior programontwikkelaar by YouTube, sê hy het by sy lessenaar gesit toe die brandalarm afgegaan het.Vorhies het aan The New York Times gesê hy het sy elektriese skaatsplank gegryp en na ’n uitgang gevlug. Hy het ’n man by een van die kantoor se buitelugeetplekke sien lê.“Daar was ’n rooi kol op sy maag en hy het nie beweeg nie. Sy hemp was deurweek met bloed,” sê VorhiesVorhies sê ’n mens kan vanaf die een parkeerterrein die buitelugeetplek sonder ’n werknemerskaart bereik.The New York Times berig Sundar Pichai, hoof van Google, wat YouTube besit, sê Google doen alles in sy vermoë om die gesinne van die slagoffers by te staan.Pres. Donald Trump het sy simpatie met die slagoffers betuig, berig The New York Times.Aghdam het in San Diego, Kalifornië, gewoon.Die polisie het min inligting oor haar bekend gemaak, maar sy het 'n videokanaal en webwerf bestuur en meestal video's opgelaai, veral oor veganisme en wreedheid teenoor diere.Volgens haar pa het sy die YouTube-maatskappy gehaat omdat hulle haar nie meer vir die videoplasings vergoed het nie. Daar is geld te maak uit video's op die kanaal deur advertensieplasings, maar die maatskappy kan dit enige tyd stopsit, berig die BBC. - Netwerk24

YouTube-skieter dalk ‘gegrief oor rekening’

Kommentaar

Republikein 2025-05-16

Meld asseblief aan om kommentaar te lewer

YouTube-skieter dalk ‘gegrief oor rekening’

Kommentaar

Republikein 2025-05-16

Meld asseblief aan om kommentaar te lewer

MELD AAN

Advertensie