Yaris baas in die noorde

Tielman van LillTsumeb Motorklub het die afgelope Saterdag die Azurite-tydren onder die vaandel van Windhoek Motorklub (WMK) aangebied, waaraan 13 spanne in vyf verskillende afdelings deelgeneem het.Die kompetisie van tien supersneldele (128.8 km) was die derde in vanjaar se nasionale kampioenskap wat by die Maroela-ruskamp begin en geëindig het. Om dinge interessant te maak, het die organiseerders twee nuwe trajekte as ’n verrassing vir die deelnemers bygevoeg. Bekende dele wat wel gebruik was, is Max Plank, Namfo, Piet Abenab, Koos se land en die Tsintsabispad met Donkievlak en Varkplaas wat hul buiging gemaak het.Jaco Redelinghuys en sy navigator Dries Booysen met ’n S4-klas 4x4 Toyota Yaris het vanjaar hul derde oorwinning in hul klas behaal en algeheel baas gespeel. Sedert Redelinghuys verlede jaar met die Shell V-Power Cattle Country- tydren by Gobabis ’n ontydige ontmoeting met ’n kameeldoringboom gehad het, het die duo in 2019 aan die res van die jaers behoorlik gewys waar Dawid die wortels gegrawe het.Formidabele jaers soos Richard Slamet (S4 4x4 Subaru Sti) en Wilro Dippenaar (S4 4x4 Toyota Yaris S2000) kon vanjaar weens breuke aan hul karre nog nie ’n enkele kampioenskappunt verdien nie. Allan Martin (S4 4x4 VW Polo S2000) moes dié naweek tydens supersneldeel 7 die handdoek ingooi nadat Groen Mamba, sy S4-klas 4x4 VW Polo S2000, ’n klep gebuig het. Martin het wel tevore by die Cattle Country- en Dunes-tydren by Swakopmund broodnodige punte versamel.Roland Hummel en Juan Erlank van Tsumeb het vir die eerste keer in bykans twee jaar ’n welkome terugkeer gemaak. Anders as in die verlede waar hulle in die S1-klas vir 4x2 1.6-litervoertuie deelgeneem het, het Himmel en navigator Erlank hul merk in die S4-klas met ’n 4x4 Toyota RunX S2000 gemaak deur tweede ná Redelinghuys te eindig.Issai Nhinda wat met Tinus Malan in die navigasiesitplek derde in die S4-klas geëindig het, het ná bykans tien jaar weer besluit om die tydrenwêreld van stof en petroldampe te betree. Nhinda se 4x4 Subaru het ’n skrale agt sekondes voor Pieter Greeff en navigator JP Robinson die laaste sneldeel voltooi, wat beslis ’n pluimpie vir Greeff se talente is. Greeff met Mohatu, sy S1-klas 4x2 Toyota Corolla, het sy klas ingepalm en algeheel vierde geëindig.Slegs twee inskrywing is vir die veldrenafdeling (off-road) ontvang, waar Jacques Kruger en Roché Louw met sy 4x2 Toyota Hilux die OR D-klas ingepalm het. Wildo Bartch en Raymond Fourie (OR C) voltooi die byeenkoms volgens supertydrenreëls en verdien wel met hul 4x2 V6 Ford Courier-bakkie punte vir die nasionale kampioenskap.‘VER GENOEG’Ander spanne wat nie die pyp kon rook nie, sluit in Handré en Tara Myburgh (S2-klas 4x2 VW Gholf) wat ’n as in die ratkas in SS4 afgedraai het. Welmie Kühn/René van Wyk (S1-klas 4x2 Toyota RunX) breek ’n sydryfas, terwyl Jan Everson/Fanie Botha (S2-klas 4x2 VW Polo) die Naartjie se linkeragterwiel in ’n sloot tydens SS3 afbreuk en so byna die oranje Polo omdop.Zachary Martin/Michael Strydom (S1-klas 4x2 VW Golf) wil nie behoorlik op al vier silinders vuur nie en moet reeds in die eerste supersneldeel aftrek. Wilro Dippenaar/Riaan van der Westhuizen (S4-klas 4x4 Toyota Auris S2000) se ratkas breek in SS2 en Richard Slamet/Cecil Koorts (S4-klas 4x4 Sti Subaru) breek ’n laerbeheerarm en met die twee voorwiele wat elkeen sy eie rigting inslaan, eindig hul tydren toe Slamet die Subaru rol.Everson sê: “Ek het Saterdag al gevoel hoe rol ons.”Die WMK bedank die hele Himmel-gesin en veral Aisha Pitch en Roland Himmel word vir hul besondere bydrae uitgesonder.Die uitslae:Algeheel: 1 Redelinghuys/Booysen 1 uur 6 minute 55 sekondes, 2 Himmel/Erlank 1:08:35, 3 Nhinda/Malan 1:29:59, 4 Greeff/Robinson 1:30:07, 5 Kruger/Louw 1:32:23. Supertydrenreëls: Bartsch/Fourie 2:01:45.Die volgende tydren in die nasionale kampioenskap vind op 17 Augustus by Walvisbaai plaas wat deur die plaaslike motorklub daar aangebied sal word. Gobabis Motorklub hou op 10 Augustus sy tweede Suyas-veldrenbyeenkoms vir 2019 waar plaasbakkies asook 4x4- Uris uit die Kalahari welkom is.- tielman@republikein.com.na

Yaris baas in die noorde

Kommentaar

Republikein 2026-09-10

Meld asseblief aan om kommentaar te lewer

Yaris baas in die noorde

Kommentaar

Republikein 2026-09-10

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.