Wêreldrugby skors vir Rassie, beboet Saru

PAS IN: Rassie Erasmus, die Suid-Afrikaanse Rugbyunie (Saru) se direkteur van rugby, is met onmiddellike ingang vir die volgende twee maande uit alle rugbyaktiwiteite geskors en mag tot 22 September volgende jaar nie op die dae van wedstryde aan enige aktiwiteite deelneem nie.
Dít nadat hy skuldig bevind is aan ’n oortreding van Wêreldrugby se gedragskode met die kritiek wat hy in ’n uurlange video op die Australiese skeidsregter Nic Berry gerig het. Erasmus het talle van Berry se foute in die eerste toets tussen die Springbokke en die Britse en Ierse Leeus vroeër vanjaar uitgewys.
Wêreldrugby sê in ’n nuusverklaring ook dat Erasmus ’n waarskuwing gekry het en dat hy aan die “betrokke wedstrydbeamptes” verskoning moet vra.
Saru is met £20 000 (R418 755) beboet en ook gedwing om aan die betrokke wedstrydbeamptes jammer te sê.
– Netwerk24