Wêrelddag vir Renosters met suksesse gedenk

Francoise Steynberg - Wêrelddag vir Renosters word vandag gevier met Namibië wat met die grootste swartrenosterbevolking (93%) en die tweede meeste witrenosters ter wêreld spog. “Tot dusver vanjaar is 22 renosters in Namibië gestroop, teenoor 46 verlede jaar; 78 in 2018; 55 in 2017 en 61 in 2016,” het die woordvoerder van die ministerie van die omgewing, bosbou en toerisme, mnr. Romeo Muyunda, in ’n mediaverklaring gesê.“Die ministerie meen die beste strategie vir 2020-’21 wat sedert 2014 voortgesit word, is om soveel as moontlik renosters in hoërisikogebiede te onthoring,” het Muyunda gesê.Hy meen dit is ook nodig om renosters uit dié hoërisikogebiede na veiliger gebiede te verskuif en derhalwe nuwe bevolkings te vestig om groei te stimuleer. “Intelligensie en wetstoepassing is die sleutelfaktore in die afname in renosterstropery, te danke aan ’n nuwe afdeling wat in die ministerie gevestig is wat uitsluitlik op wildbeskerming, intelligensie en ondersoeke fokus,” het die woordvoerder verduidelik. Volgens Muyunda is die honde-eenheid van die ministerie suksesvol en nou permanent in die Etosha Nasionale Park ontplooi. Hy sê meer honde-eenhede word vir die toekoms beplan. Nasionale veiligheidsmagte is ook in Etosha ontplooi om renosterstropery hok te slaan. “Gesamentlike taakmagte van die Namibiese polisie se eenheid vir beskermde hulpbronne (PRU) en die eenheid van intelligensie en ondersoeke van die ministerie het ook bewys dat hulle uiters suksesvol is.” Muyunda sê hierdie samewerking het die ingesteldheid vanaf reaktiewe tot proaktiewe wetstoepassing help verander. “Eerder as om op ’n dooie renoster af te kom, word voornemende stropers nou meer gereeld in hegtenis geneem terwyl hulle nog besig is om saam te sweer om ’n renoster te stroop.” Volgens die woordvoerder is 30% van die 88 inhegtenisnemings verwant aan renosterstropery in die eerste helfte van die jaar, verdagtes wat saamgesweer het om renosters te stroop. “Verlede jaar is 68 uit die totaal van 131 verdagtes (meer as 50%) in hegtenis geneem voordat hulle ’n renoster kon stroop.” Muyunda sê noue samewerking met die regsbank het ook tot skuldigbevindings met gepaste strawwe gelei.“Ses oortreders is in Mei 2020 in twee sake van sameswering van renosterstropery gevonnis.” Boonop, volgens Muyunda, is ’n lang lys van ivoorsmokkelaars, middelmanne en internasionale meesterbreine van misdaadsindikate in hegtenis geneem. - francoise@republikein.com.na

Wêrelddag vir Renosters met suksesse gedenk

Kommentaar

Republikein 2025-12-19

Meld asseblief aan om kommentaar te lewer

Wêrelddag vir Renosters met suksesse gedenk

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.