Wêreldbank verlaag ook groei vir SA

Nellie Brand-Jonker – Die Wêreldbank verwag Suid-Afrika se ekonomiese groei gaan in 2018 met net 1% groei.Dit is 0,4 van ’n persentasiepunt laer as die 1,4% wat die Wêreldbank in April voorspel het.Die organisasie het sy Africa Pulse-verslag uitgereik, wat twee keer per jaar uitgereik word.Die bank het ook sy verwagting oor die ekonomiese groei vir die komende twee jaar vir Suid-Afrika afwaarts aangepas.Die verwagting is nou dat Suid-Afrika se ekonomie 1,3% in 2019 en 1,7% in 2020 gaan groei. Dit is 0,5 en 0,2 van ’n persentasiepunt laer as die voorspelling in April.Die rede vir die gedempte groei in 2019 is die trae vraag van verbruikers weens hoë werkloosheid en die stadige groei in kredietverlening aan huishoudings terwyl die regering ook sy besteding in toom moet hou om sy begroting te laat klop, luidens die verslag.Die effense versnelling in ekonomiese groei in 2020 word gegrond op die verwagting dat die regering se agenda vir strukturele hervorming gaan begin vorder en dat dit beleggings ’n hupstoot sal gee terwyl beleidsonsekerheid afneem.Die verwagte ekonomiese groei vir 2018 is effens beter as die Reserwebank se jongste voorspelling van 0,7%, wat ook onlangs afwaarts aangepas is van 1,2%.Dit is minder as die kredietgraderingsagentskap Moody’s s’n, wat ook in Augustus afwaarts aangepas is tot 1,5%, van 1,6%.In die verslag is gesê die trae groei in Angola, Nigerië en Suid-Afrika – die drie grootste ekonomieë in Afrika suid van die Sahara – belemmer ekonomiese aktiwiteit in die streek.Laer olieproduksie weens kapasiteitsbeperkinge werk die positiewe invloed van hoër oliepryse in Angola en Nigerië teë.In Suid-Afrika hou die inkrimping in die landbou-, mynbou en konstruksiesektore die ekonomie terug.Die ekonomiese groei in die streek gaan na verwagting 2,7% in 2018 wees. Dit is beter as die 2,3% in 2017, maar is skaars meer as die bevolkingsgroei.Dit is ook 0,4 persentasiepunte laer as wat in April verwag is weens die afwaartse aanpassing in die verwagting vir ekonomiese groei vir die drie groot ekonomieë.“Die pad vorentoe is hobbelrig,” word daar in die verslag gesê.Die eksterne omgewing het ook minder gunstig vir die lande in die streek geword. “Internasionale handel en nywerheidsproduksie het momentum verloor. Metaal- en landboupryse het gedaal weens die kommer oor handelstariewe en die swak vooruitsig vir vraag.” – Netwerk24

Wêreldbank verlaag ook groei vir SA

Kommentaar

Republikein 2026-02-03

Meld asseblief aan om kommentaar te lewer

Wêreldbank verlaag ook groei vir SA

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.