Wêreld vier opvoeders se belangrikheid

Yochanaan CoetzeeDie belang van die sogenoemde “moeder van elke beroep” is gister op Wêrelddag vir Onderwysers in baie lande gevier.Onderwysers is noodsaaklik vir die ontwikkeling van mense en gemeenskappe.Om ’n dag in die lewe van ’n opvoeder te verstaan, hetRepublikein by die Primêre Skool Olof Palme in Katutura gaan kuier en met onderwysers gesels oor hul werk, die uitdagings daaraan verbonde en waarom hulle hul werk as meer as bloot ’n beroep beskou.“Ek wou altyd mense help om hul lewens te verbeter, maar wou nie ’n pastoor geword het nie,” het mnr. Andre Kandundu geskerts. Hy gee Engels en kuns en staan al vier jaar in die beroep. “Toe besluit ek om ’n onderwyser te word en ek ervaar dit as ’n baie bevredigende beroep”.Soos baie van sy kollegas begin sy dag soggens vroeg. Om vyfuur is hy wakker en om halfsewe is hy en die ander opvoeders by die skool om voor te berei om die dag aan te pak.Me. Julia Hangula, die skoolhoof, is volgende jaar reeds 30 jaar lank in die onderwys. Sy het rekeningkunde op universiteit gestudeer, maar kan nie dink aan ’n ander loopbaan wat haar soveel vreugde sou verskaf nie.“Baie kinders, veral die wat nie preprimêre skole bygewoon het nie, kom rou na ons toe in graad 1 en jy moet die kind alles leer. Van die alfabet tot hoe om ’n goeie lid van die samelewing te wees,” het sy gesê.Baie uitdagings“Ons gee ons alles om die kinders te inspireer en hulle intellektueel, emosioneel en sosiaal te ontwikkel, totdat ons hulle oorgee aan ons kollegas by hoërskole. Dis altyd hartseer om hulle te sien gaan, maar terselfdertyd is jy so trots dat hulle vorder.”Nie dat dit ’n maklike paadjie is nie. Behalwe vir lang werksure en talle buiteskoolse aktiwiteite, moet die onderwysers tot laat sit en ekstra klasse aanbied vir leerlinge wat sukkel. Daarna moet hulle nog die dag se toetse merk en die volgende dag se werk beplan. “’n Mens hou nie op om ’n onderwyser te wees wanneer jy by die skoolhek uitstap nie. Ons dink heeltyd aan ons leerlinge. Al is ons met vakansie op die plaas, beplan ons hoe gaan ons die volgende semester benader,” het me. Ndateelela Hamukwaya, ’n wiskunde-onderwyser met agt jaar ondervinding, gesê.“Die rede waarom ons skool gee, is om te sien dat ons leerlinge iets word in die lewe en hul omstandigheide verbeter. Een van my oudskoliere studeer nou ingenieurswese op universiteit en dit maak my verskriklik trots om te weet ek het ’n rol in sy opvoeding gespeel,” het sy vertel.Ongelukkig bied hierdie beroep vele uitdagings.“Baie van ons leerlinge kry swaar en dit kan ’n mens soms laat huil. Baie onderwysers knyp van hul geld af om leerlinge te help. Jy kan tog nie sien dat ’n kind in die koue winter sonder ’n baadjie skool toe kom nie, ” het me. Lorraine Katamila, ’n onderwyseres met 21 jaar se ondervinding, gesê.“Dit is ook baie hartseer om briljante leerlinge na jare te sien en te sien hoe omstandighede hulle nie toegelaat het om hul volle potensiaal te bereik nie,” het mnr. Gabriel Hambeka, ’n departementshoof by die skool, vertel. “Daar is baie maatskaplike probleme wat ons kinders ervaar in ons gemeenskappe en dit kan hul aandag van hul skoolwerk aflei.”“Tog is dit ’n ongelooflike voorreg om ’n onderwyser te wees. Ek geniet die werk, die kinders en om te sien hoe hulle ontwikkel. Ek is tot die onderwys geroepe. Ek is gebore daarvoor,” het Hambeka met ’n groot glimlag gesê.

Wêreld vier opvoeders se belangrikheid

Kommentaar

Republikein 2025-05-15

Meld asseblief aan om kommentaar te lewer

Wêreld vier opvoeders se belangrikheid

Kommentaar

Republikein 2025-05-15

Meld asseblief aan om kommentaar te lewer

MELD AAN

Advertensie