Wonderboom-rampvlug: Als loop van begin af skeef
Die vlugingenieur van die veteraanvliegtuig wat verlede Dinsdagmiddag in die noorde van Pretoria neergestort het, het waarskynlik naarstiglik die onderstel vinnig opgetrek in 'n verbete poging om die vliegtuig in die lug te hou.
Terwyl die 54-jarige Chris “Barries” Barnard aan die tegniese kant gestoei het, het die Convair 340 se twee Australiese vlieëniers probeer om die vliegtuig tussen twee geboue van die Moorddrift-melkery te stuur vir 'n relatief veilige noodlanding.
Die Convair se 32 m-vlerkspan was egter te wyd en het die geboue getref en neergestort.
Barnard is kort ná die ongeluk dood, terwyl Douglas Haywood, die een vlieënier, verskeie beenbreuke aan sy bene en arms opgedoen het.
Luidens die Australiese media is hy steeds in 'n kritieke toestand in die hospitaal.
Ross Kelly, die ander vlieënier, is lig beseer. Sy vrou, Lyndal, was 'n passasier in die vliegtuig toe dit vir oulaas 'n vlug teen sonsondergang gehad het.
Afgesien van die bemanning het die meeste van die ander 15 passasiers saam met haar almal 'n aandeel in die restourasie van die vliegtuig gehad.
Kelly en Haywood was albei hoogs ervare vlieëniers van die Australiese lugdiens Qantas. Qantas sê in 'n verklaring Kelly het pas afgetree terwyl Haywood steeds vir hulle gevlieg het.
Barnard sou verlede Donderdag saam met Kelly en Haywood, asook drie Nederlanders verbonde aan die Aviodrome-lugvaartmuseum in Nederland, die Convair na Nederland geneem het.
Rovos Rail, die vorige eienaar van die vliegtuig, het die vliegtuig aan die lugvaartmuseum in Sentraal-Nederland geskenk.
Die Convair 340 word deur lugvaartentoesiaste beskou as 'n ikoniese vliegtuig wat die opbloei van passasiersdienste ná die Tweede Wêreldoorlog ingelui het. Die Nederlandse lugdiens KLM het die vliegtuig minstens 'n dekade lank in die middel van die vorige eeu gebruik, vandaar Aviodrome se belangstelling om die vliegtuig vir hul versameling te bekom.
Kelly, Haywood en Barnard het verlede jaar 'n soortgelyke vliegtuig sonder enige probleme vanaf Wonderboom na Australië gevlieg.
Barnard, wat beskryf word as 'n kenner in veteraanvliegtuie met radiale suier-enjins (waar die suiers in 'n sirkel om 'n sentrale krukas sit) het maande lank albei die Convairs versigtig en tydsaam gerestoureer.
Dinsdag se vlug het van meet af aan skeefgeloop en die vliegtuig het reeds kort voor die opstyging “vreeslik gebackfire”, sê Gert de Klerk, wat op die Wonderboom-lughawe was toe die vliegtuig opgestyg het. Drie minute later het dit in 'n rook- en stofbol neergestort.
“In drie minute is daar bitter min wat jy kan doen as jou een enjin buite werking is.”
Barnard het die onderstel gelig, maar om een of ander rede lyk dit of die enjin wat gaan staan het se skroef nie gevaan was om verdere windweerstand te verminder nie.
NOODPROSEDURES
Ooreenkomstig noodprosedures sou die vlieëniers 'n stadige draai na regs, waar die werkende enjin gesit het, moes maak om te probeer terugkeer na die lughawe.
De Klerk sê die linkerenjin het waarskynlik reeds op die grond al begin brand. Die Convair het twee 18-silinder-enjins, en 'n olie- of brandstoflekkasie kon veroorsaak het dat olie of brandstof op die warm enjin gedrup en aan die brand geslaan het.
“Dit kon heel moontlik ook die 'pot' op een van die silinders wees wat afgeskiet of gekraak het,” meen Ernest Claassen, 'n internasionale vliegongelukondersoeker.
Hy sê die Convair behoort gemaklik met een enjin te kan vlieg, maar Dinsdag se rampvlug het waarskynlik weens die stukkende enjin nooit genoeg hoogte gekry vir 'n gekontroleerde noodlanding nie.
Hy sê al die papierwerk en toetsvlugte vir die vliegtuig se vlug na Nederland was reeds gedoen.
Die toetsvlugte het juis 'n klimtoets met net een enjin ingesluit.
In die drie minute voordat dit neergestort het, sou die bemanning met 'n legio probleme aan boord gestoei het.
Die oorwig van die impak was op die vlieëniers se kajuit toe die vliegtuig eers die geboue en toe die grond getref het.
Een van die melkery se werkers, Thabang Moloto (20), se bene moes onder die knie afgesit word nadat hy vermoedelik deur een van die skroewe getref is.
Hy was teen Vrydag in 'n stabiele toestand. Agttien mense is in die ongeluk beseer, van wie Moloto en Haywood die ernstigste ongevalle was. – Netwerk24/Rapport
Terwyl die 54-jarige Chris “Barries” Barnard aan die tegniese kant gestoei het, het die Convair 340 se twee Australiese vlieëniers probeer om die vliegtuig tussen twee geboue van die Moorddrift-melkery te stuur vir 'n relatief veilige noodlanding.
Die Convair se 32 m-vlerkspan was egter te wyd en het die geboue getref en neergestort.
Barnard is kort ná die ongeluk dood, terwyl Douglas Haywood, die een vlieënier, verskeie beenbreuke aan sy bene en arms opgedoen het.
Luidens die Australiese media is hy steeds in 'n kritieke toestand in die hospitaal.
Ross Kelly, die ander vlieënier, is lig beseer. Sy vrou, Lyndal, was 'n passasier in die vliegtuig toe dit vir oulaas 'n vlug teen sonsondergang gehad het.
Afgesien van die bemanning het die meeste van die ander 15 passasiers saam met haar almal 'n aandeel in die restourasie van die vliegtuig gehad.
Kelly en Haywood was albei hoogs ervare vlieëniers van die Australiese lugdiens Qantas. Qantas sê in 'n verklaring Kelly het pas afgetree terwyl Haywood steeds vir hulle gevlieg het.
Barnard sou verlede Donderdag saam met Kelly en Haywood, asook drie Nederlanders verbonde aan die Aviodrome-lugvaartmuseum in Nederland, die Convair na Nederland geneem het.
Rovos Rail, die vorige eienaar van die vliegtuig, het die vliegtuig aan die lugvaartmuseum in Sentraal-Nederland geskenk.
Die Convair 340 word deur lugvaartentoesiaste beskou as 'n ikoniese vliegtuig wat die opbloei van passasiersdienste ná die Tweede Wêreldoorlog ingelui het. Die Nederlandse lugdiens KLM het die vliegtuig minstens 'n dekade lank in die middel van die vorige eeu gebruik, vandaar Aviodrome se belangstelling om die vliegtuig vir hul versameling te bekom.
Kelly, Haywood en Barnard het verlede jaar 'n soortgelyke vliegtuig sonder enige probleme vanaf Wonderboom na Australië gevlieg.
Barnard, wat beskryf word as 'n kenner in veteraanvliegtuie met radiale suier-enjins (waar die suiers in 'n sirkel om 'n sentrale krukas sit) het maande lank albei die Convairs versigtig en tydsaam gerestoureer.
Dinsdag se vlug het van meet af aan skeefgeloop en die vliegtuig het reeds kort voor die opstyging “vreeslik gebackfire”, sê Gert de Klerk, wat op die Wonderboom-lughawe was toe die vliegtuig opgestyg het. Drie minute later het dit in 'n rook- en stofbol neergestort.
“In drie minute is daar bitter min wat jy kan doen as jou een enjin buite werking is.”
Barnard het die onderstel gelig, maar om een of ander rede lyk dit of die enjin wat gaan staan het se skroef nie gevaan was om verdere windweerstand te verminder nie.
NOODPROSEDURES
Ooreenkomstig noodprosedures sou die vlieëniers 'n stadige draai na regs, waar die werkende enjin gesit het, moes maak om te probeer terugkeer na die lughawe.
De Klerk sê die linkerenjin het waarskynlik reeds op die grond al begin brand. Die Convair het twee 18-silinder-enjins, en 'n olie- of brandstoflekkasie kon veroorsaak het dat olie of brandstof op die warm enjin gedrup en aan die brand geslaan het.
“Dit kon heel moontlik ook die 'pot' op een van die silinders wees wat afgeskiet of gekraak het,” meen Ernest Claassen, 'n internasionale vliegongelukondersoeker.
Hy sê die Convair behoort gemaklik met een enjin te kan vlieg, maar Dinsdag se rampvlug het waarskynlik weens die stukkende enjin nooit genoeg hoogte gekry vir 'n gekontroleerde noodlanding nie.
Hy sê al die papierwerk en toetsvlugte vir die vliegtuig se vlug na Nederland was reeds gedoen.
Die toetsvlugte het juis 'n klimtoets met net een enjin ingesluit.
In die drie minute voordat dit neergestort het, sou die bemanning met 'n legio probleme aan boord gestoei het.
Die oorwig van die impak was op die vlieëniers se kajuit toe die vliegtuig eers die geboue en toe die grond getref het.
Een van die melkery se werkers, Thabang Moloto (20), se bene moes onder die knie afgesit word nadat hy vermoedelik deur een van die skroewe getref is.
Hy was teen Vrydag in 'n stabiele toestand. Agttien mense is in die ongeluk beseer, van wie Moloto en Haywood die ernstigste ongevalle was. – Netwerk24/Rapport
Kommentaar
Republikein
Geen kommentaar is op hierdie artikel gelaat nie