Wonde gelek ná Pumas pak slae uitdeel
Die onervare Namibiërs kon nie daarin slaag om hul balbesit te beskerm nie.
Andrew Poolman - Die reis na Nelspruit was nie heeltemal 'n futiele oefening vir Namibië se rugby nie, ondanks die wegholtelling van 106-0 waarmee die ISG Pumas Saterdag teen die verswakte Windhoek Draught Welwitschias geseëvier het.
So sê mnr. Johan Diergaardt, die afrigter aan die stuur van wat in effek 'n Namibiese tweede of derde span vir die SuperSport-uitdaagwedstryd was terwyl die nasionale span terselfdertyd in Uruguay op toer is.
Die Pumas is die heersende titelhouer in die kompetisie en onoorwonne voorloper, wat reeds met heelwat sterker spanne klaargespeel het.
Saterdag in die Mbombela-stadion was die gasheerspan rustyd reeds met 49-0 voor. Die Pumas het van hul minder gereelde spelers speelkans gegee met een wedstryd oor voor die semifinaal, maar het gedissiplineerd gebly om teen swak opposisie 16 drieë in te ryg.
“Dit het nie so goed gegaan nie. Om eerlik te wees, die oormag was te groot,” sê Diergaardt.
“In sekere aspekte het ons beter gespeel as teen die Luiperds. Ons skrums was meer solied as verlede week en lynstane ook, maar daarna kon ons nie daarin slaag om die bal vir enige lang periode te behou nie. Wanneer die Pumas die bal afgeneem het, het hulle drieë gedruk en was ons maar weer terug onder ons eie pale.
“Daar is wel goeie dinge wat uit die wedstryd gekom het. Dit was blootstelling vir spelers wat tevore net klubrugby gespeel het, maar wat potensiaal het en hand opgesteek het dat hulle in die toekoms kan ontwikkel.
“Dit is die moeite werd om te sien hoe spelers onder sulke omstandighede karakter wys. Die Pumas het 'n baie goeie span. Hulle speel baie fisiek en direk en ons het eenvoudig nie die mas opgekom daarteen nie.
“Geen van ons individuele spelers het heeltemal uit die bus geval nie. Ek wil nie name uitsonder nie, maar daar was wel ouens wat onder die omstandighede goed teruggeveg het.
“Uiteraard het jy vyftien spelers op die veld nodig om konstant kompeterend te wees. Vyf of ses of tien op 'n slag is nie goed genoeg nie, want teen die tempo waarmee die Suid-Afrikaanse provinsiale spanne speel, is een verbroude duikslag genoeg om punte teen jou te verseker. Dit was 'n harde leerskool.”
Die Pumas se losskakel Cobus Marais het 27 punte vir die dag versamel, met 'n drie en elf doelskoppe.
VALKE AFGEWAG
Diergaardt sê daar was nie ernstige beserings aan die Namibiese kant nie.
Hy is ook hoopvol dat die samewerking van die klubafrigters in die premierliga sal voortgaan, sodat die Welwitschias se span vandeesweek so goed as moontlik gekies kan word en voorberei met die oog op hul laaste wedstryd in die kompetisie, teen die Valke in Windhoek.
Die premierliga-wedstryd tussen FNB Wanderers en FNB Unam wat komende naweek sou plaasvind, is byvoorbeeld reeds uitgestel om op 27 Julie gespeel te word.
Die Welwitschias het verlede jaar 'n seldsame oorwinning op Suid-Afrikaanse bodem behaal deur die Valke in Kemptonpark met tien punte (34-24) te verslaan.
Die Oos-Gautengers het egter vanjaar reeds twee uit hul ses wedstryde gewen – teen die Griffons en Luiperds – en bevind hulle in die vyfde plek in die noordelike groep (13 punte), teenoor die Namibiërs se puntelose agtste plek aan die onderpunt.
'n Magtige ommeswaai word dus vereis indien die Welwitschias hoop om binne 'n week die Valke se appelkar om te smyt.
• Namibië se nasionale span het intussen via Johannesburg en Sao Paulo, Brasilië, in Uruguay se hoofstad Montevideo aangekom vir hul deelname aan die Wêreldrugby Nasiebekertoernooi.
Kaptein Johan Deysel en sy manne speel môre teen die Argentynse A-span, voor hul latere wedstryde teen Uruguay en Rusland.
So sê mnr. Johan Diergaardt, die afrigter aan die stuur van wat in effek 'n Namibiese tweede of derde span vir die SuperSport-uitdaagwedstryd was terwyl die nasionale span terselfdertyd in Uruguay op toer is.
Die Pumas is die heersende titelhouer in die kompetisie en onoorwonne voorloper, wat reeds met heelwat sterker spanne klaargespeel het.
Saterdag in die Mbombela-stadion was die gasheerspan rustyd reeds met 49-0 voor. Die Pumas het van hul minder gereelde spelers speelkans gegee met een wedstryd oor voor die semifinaal, maar het gedissiplineerd gebly om teen swak opposisie 16 drieë in te ryg.
“Dit het nie so goed gegaan nie. Om eerlik te wees, die oormag was te groot,” sê Diergaardt.
“In sekere aspekte het ons beter gespeel as teen die Luiperds. Ons skrums was meer solied as verlede week en lynstane ook, maar daarna kon ons nie daarin slaag om die bal vir enige lang periode te behou nie. Wanneer die Pumas die bal afgeneem het, het hulle drieë gedruk en was ons maar weer terug onder ons eie pale.
“Daar is wel goeie dinge wat uit die wedstryd gekom het. Dit was blootstelling vir spelers wat tevore net klubrugby gespeel het, maar wat potensiaal het en hand opgesteek het dat hulle in die toekoms kan ontwikkel.
“Dit is die moeite werd om te sien hoe spelers onder sulke omstandighede karakter wys. Die Pumas het 'n baie goeie span. Hulle speel baie fisiek en direk en ons het eenvoudig nie die mas opgekom daarteen nie.
“Geen van ons individuele spelers het heeltemal uit die bus geval nie. Ek wil nie name uitsonder nie, maar daar was wel ouens wat onder die omstandighede goed teruggeveg het.
“Uiteraard het jy vyftien spelers op die veld nodig om konstant kompeterend te wees. Vyf of ses of tien op 'n slag is nie goed genoeg nie, want teen die tempo waarmee die Suid-Afrikaanse provinsiale spanne speel, is een verbroude duikslag genoeg om punte teen jou te verseker. Dit was 'n harde leerskool.”
Die Pumas se losskakel Cobus Marais het 27 punte vir die dag versamel, met 'n drie en elf doelskoppe.
VALKE AFGEWAG
Diergaardt sê daar was nie ernstige beserings aan die Namibiese kant nie.
Hy is ook hoopvol dat die samewerking van die klubafrigters in die premierliga sal voortgaan, sodat die Welwitschias se span vandeesweek so goed as moontlik gekies kan word en voorberei met die oog op hul laaste wedstryd in die kompetisie, teen die Valke in Windhoek.
Die premierliga-wedstryd tussen FNB Wanderers en FNB Unam wat komende naweek sou plaasvind, is byvoorbeeld reeds uitgestel om op 27 Julie gespeel te word.
Die Welwitschias het verlede jaar 'n seldsame oorwinning op Suid-Afrikaanse bodem behaal deur die Valke in Kemptonpark met tien punte (34-24) te verslaan.
Die Oos-Gautengers het egter vanjaar reeds twee uit hul ses wedstryde gewen – teen die Griffons en Luiperds – en bevind hulle in die vyfde plek in die noordelike groep (13 punte), teenoor die Namibiërs se puntelose agtste plek aan die onderpunt.
'n Magtige ommeswaai word dus vereis indien die Welwitschias hoop om binne 'n week die Valke se appelkar om te smyt.
• Namibië se nasionale span het intussen via Johannesburg en Sao Paulo, Brasilië, in Uruguay se hoofstad Montevideo aangekom vir hul deelname aan die Wêreldrugby Nasiebekertoernooi.
Kaptein Johan Deysel en sy manne speel môre teen die Argentynse A-span, voor hul latere wedstryde teen Uruguay en Rusland.
Kommentaar
Republikein
Geen kommentaar is op hierdie artikel gelaat nie