Wolkekrabbers op die horison vir Swakopmund

Jessica Botes - Die Swakopmundse stadsraad het Donderdag sonder die insae van die dorp se inwoners die hoogtebeperkings van geboue ver­ander.

In sy agenda het die stadsraad erken dat inwoners nie bewus is van die voorgestelde veranderinge nie en hulle nie geraadpleeg is rakende die bepalings van die dorpsbeplanningskema nie. “Die plaaslike owerheid wysig onder meer beleide, reëls en skemas deur die besluitneming van die stadsraad. Hoekom moet die publiek in die administrasie van sy dorpsgronde betrokke wees?” lui die agenda.

Ingevolge die wysiging van die dorpsbeplanningskema ten opsigte van beperkings op hoogte, massa en digtheid binne die munisipale gebied van Swakopmund, mag geboue in die sake-, woon- en nywerheidsgebiede tot ’n maksimum hoogte van 40 meter, óf 13 verdiepings, gebou word.

Enkelwonings mag kragtens die wysiging 15 meter hoog gebou word terwyl woonstelblokke 40 meter hoog mag wees. In algemene sake-, nywerheids- en institusionele gebiede is die nuwe hoogtebeperkings vir geboue ook 40 meter. Geboue en kantore in plaaslike sake- en ligte nywerheidsgebiede mag tot 30 meter hoog gebou word.

Raadslid Wilfried Groenewald het sy kommer uitgespreek oor die voor­gestelde veranderinge aan die dorpsbeplanningskema.

“Ons bevind onsself aan die een kant in die posisie waar ons versoek word om ernstige verandering aan die dorpsbeplanningskema aan te bring en aan die ander kant het ons verpligtinge met betrekking tot ons erfenisregulasies,” het Groenewald gesê.

Volgens hom is dit ook kommerwekkend dat die inwoners van Swakopmund nie van die wysiging weet nie en nie vooraf geraadpleeg is nie. Groenewald het ook daarop gewys dat die dorp se ekonomie op die myn- en toerismebedryf gebaseer is en vir beide reeds voorsiening gemaak is.

“Die dorp voldoen reeds aan die mynbedryf se behoeftes vir kantoorruimte, nywerheidsgrond en huisvesting. Wat is die nood dus vir hoë geboue in Swakopmund se middedorp?

“Die rede waarom die toerismebedryf op Swakopmund so suksesvol is, is omdat dit ’n baie gewilde bestemming vir buitelanders is. Is dit die unieke ou geboue en strukture? Is dit die groot oop ruimtes rondom die middedorp met openbare tuine en mooi restaurante? Na my mening hou mense baie van die ou nostalgiese atmosfeer waarin hulle kan ontspan,” het Groenewald gesê.

Volgens die stadsraad is daar ’n algemene vrees vir verandering en ’n idee dat die dorp gehou moet word in sy huidige onvolhoubare vorm wat duur stadsverspreiding bevorder.

“Die middedorp is reeds ten volle ontwikkel en baie min verandering word hier verwag. Daar is ook die erfeniswet wat ’n groot rol in die be­skerming van die bewaringsgebied sal speel. “Deur die hoogtebeperkings aan te pas, word beter gebruik gemaak van die grond wat ons tot ons beskikking het. Hierdie verandering sal die horison verander, maar vir hoe lank moet ons aanhou om lae geboue te bou wat in vierkante meter uitsprei?” lui die agenda.

Die stadsraad is van mening dat dit nie noodwendig ’n negatiewe inisiatief is nie en dit eerder as ’n proaktiewe benadering tot ’n meer kompakte en digte dorp gesien moet word.