Wolk hang oor SA se groei in 2019

Hanlie Stadler - Suid-Afrika se ekonomie gaan dalk in 2019 met ’n tam 1,3% groei. Dié voorspelling deur die Wêreldbank is die mees pessimistiese voorspelling nóg oor die land se groeikoers vir die jaar.Die Reserwebank het in November nog ’n optimistiese 1,9% voorspel en die Internasionale Monetêre Fonds (IMF) het in Oktober 1,4% voorspel.Die Wêreldbank se nuutste voorspelling, vervat in die tweejaarlikse Wêreld- Ekonomiese Vooruitsigte, wat Dinsdag laat in Washington uitgereik is, is 0,5 van ’n persentasiepunt laer as die instelling se vorige voorspelling, in Junie 2018.Die Wêreldbank het sy groeiverwagting vir 2019 ook met 0,5 van ’n persentasiepunt tot 0,9% verlaag. Dis steeds meer optimisties as die IMF se 0,8% en die Reserwebank se 0,6%.Vir 2020 het die Wêreldbank sy groeiverwagting met 0,2 van ’n persentasiepunt tot 1,7% verlaag, teenoor die Reserwebank se 2%.Die Wêreldbank het vir die eerste keer ook ’n voorspelling vir 2021 gewaag, van 1,8%.Vir die hele Afrika suid van die Sahara voorspel die Wêreldbank 2019-groei van 3,4%, en in 2020 en 2021 onderskeidelik 3,6% en 3,7%. Die verwagting vir 2019 en 2020 is met 0,1 van ’n persentasiepunt verminder.Vir die hele wêreld voorspel die Wêreldbank 2019-groei van 2,9%, en in 2020 en 2021 albei 2,8%. Die verwagting vir 2019 en 2020 is ook met 0,1 van ’n persentasiepunt verminder.VOORUITSIG VERDONKERIn sy ontleding sê die wêreldliggaam: “Die vooruitsig vir die wêreldekonomie in 2019 het verdonker.“Internasionale handel en investering het verswak. Handelspanning bly hoog. Verskeie groot ontluikende markte het verlede jaar beduidende finansiële druk beleef.”“Teen dié uitdagende agtergrond, gaan groei in ontluikende markte en ontwikkelende ekonomieë na verwagting in 2019 plat bly. Die versnelling in ekonomieë wat swaar op hulpbronuitvoer steun, gaan na verwagting traer wees as waarop gehoop is. Groei in baie ander ekonomieë gaan na verwagting verlangsaam.”Die Wêreldbank sê die verhoging van rentekoerse in baie ontwikkelde lande verwyder ’n faktor wat die herstel van die wêreldwye finansiële krisis van 2007-’08 ondersteun het. “Hoër skuldvlakke het sommige ekonomieë, veral armer lande, kwesbaarder gemaak vir stygende wêreldwye rentekoerse, verskuiwings in beleggersentiment, of wisselkoersskommelinge.”Die Wêreldbank is ook diep bekommerd oor meer gereelde “weerverskynsels” wat kospryse erg kan laat skommel en “armoede kan laat verdiep”.Die liggaam waarsku ontluikende lande om hulle op “turbulensie” voor te berei en stappe te doen wat ekonomiese momentum kan behou en langtermyngroei kan bevorder.Kristalina Georgieva, uitvoerende hoof en van Februarie af ook waarnemende president nadat Jim Yong Kim Maandag bedank het, sê in ’n verklaring: “Om momentum te behou, moet lande in mense belê, inklusiewe groei bevorder, en veerkragtige samelewings bou.” – Netwerk24GRYSBLOKWêreldbank se voorspellings vir 2019Die Wêreldbank se verwagting vir ekonomiese groei in 2019. In hakies is die persentasiepunt wat dit afwyk van die instelling se vorige voorspelling, in Junie verlede jaar.· Wêreld: 2,9% (-0,1)· Ontwikkelde lande: 2% (0)· Ontluikende en ontwikkelende lande: 4,2% (-0,5)· Brics: 5,2% (-0,2)· Afrika suid van die Sahara: 3,4% (-0,1)· Suid-Afrika: 1,3% (-0,5)· VSA: 2,5% (0)· Eurogebied: 1,6% (-0,1)· China: 6,2% (-0,1)· Indië: 7,5 (0)· Rusland: 1,5% (-0,3)· Brasilië: 2,2% (-0,3)· Nigerië: 2,2% (0)

Wolk hang oor SA se groei in 2019

Kommentaar

Republikein 2025-06-18

Meld asseblief aan om kommentaar te lewer

Wolk hang oor SA se groei in 2019

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie