Woede laai op teen stropers

Des Erasmus - Woede was gister een van die emosies van boere op grensplase van die munisipale gebied van Omaruru ná 'n slagting onder die klompie wild in hul worsteling om ''n rampdroogte te oorleef. Breekpunt was ''n slagterskamp op munisipale grond naby die satellietdorpie Erongopark in die rigting van die bergland. In ''n opvolgoperasie op die stropersaarde van die wilddiewe is teen gisteroggend drie gemsbokke in strikke gekry. Een het in drie strikke beland en het verwurg in ''n gespartel om los te kom. Die ander twee was so swak dat genadeskote gevuur moes word.“Dit gaan nie meer om vleis in die aantog na Kersfees nie. Dit is ''n georganiseerde wilddiefsindikaat met niemand wat blykbaar bereid is om op te tree nie,” het mnr. Adrian Lang van die plaas Okapekaha gesê. Lang en van sy werkers het Sondag ''n opvolgoperasie uitgevoer ná ''n geblaf van die werfhonde in die nag. Sy grond grens aan die munisipale gebied met nog gemsbokke, ''n sebra en selfs ''n perd wat al die rowers ten prooi geval het. “Ons kan van nege slagplekke getuig waarop die afgelope weke afgekom is. “As die prys van ''n gemsbok N$2 000 is, verteenwoordig dit N$16 000. Veel groter is die verliese as die uitwerking van die slagtings op toerisme bygereken is. Dis ''n stropery wat al hoe wyer uitkring sonder dat daar doeltreffend teen die bendes opgetree word,” het Lang gesê. “Dit gebeur nie net in die Omaruru-omgewing nie; die gruwelbendes slaan oral toe.” Op sy plaaspatrollie het hy sy eie grense nagery, maar niks gekry nie. ''n Lid van die patrollie het toe aanduidinge gekry van die stropers wat net oorkant die grensdrade opereer. Oorkant die heining tussen sy plaas en Erongopark het hulle die spore van die stropers gekry. Een gemsbok het hom doodgewurg met drie strikke waarin hy beland het. Die ander een was so swak dat die bok geskiet moes word. Volgens Lang is nuwe taktiek van die stropers om ''n paar strikke naby mekaar te stel. Namate ''n bok in ''n strik begin worstel, beland die dier in van die ander strikke. In die opvolgoperasie is 50 strikke uitgehaal op spore wat uiteindelik tot in die wilddiewe se veldslaghuis gelei het. Die strikke was in ''n klipskeur versteek om in volgende rooftogte gebruik te word. In die bosslaghuis is op draad en ander toerusting afgekom wat as bewyse gedien het dat dit ook die plek is waar die strikke gemaak word. ''n Draad was ook gespan waaraan die vleis van bokke uitgehang kan word. Die diewe se waterkanne was daar, in die plek was die potte en panne van die diewe en selfs eetplekke. In ''n opvolgoperasie gisteroggend is nog ''n jong gemsbokbul in ''n strik gekry. ''n Genadeskoot moes weer toegedien word. Die spore het daarop gedui dat dit ''n bende van drie is wat vermoedelik ook vir die diefstal van sonpanele in die omgewing verantwoordelik was. Oproepe na wetstoepassers om die diewe te kom haal, het tot gistermiddag niks opgelewer nie. In gisteroggend se operasie is nóg 20 strikke uitgehaal.

Woede laai op teen stropers

Kommentaar

Republikein 2026-06-19

Meld asseblief aan om kommentaar te lewer

Woede laai op teen stropers

Kommentaar

Republikein 2026-06-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.